ಸಂವರ್ಧನೆಯಲ್ಲಿ ಉಪಯೋಗಿಸುವ ಹೆಣ್ಣು ಹಾಗೂ ಗಂಡು ಕುರಿಗಳು ಒಂದೇ ವಂಶಾವಳಿಯಿಂದ ಬಂದಿರಬಾರದು ಹಾಗೂ ಒಳ/ಅಂತರ ಸಂಕರಣ ಸಂವರ್ಧನೆಯನ್ನು ಯಾವ ಕಾರಣಕ್ಕೂ ಅನುಸರಿಸಬಾರದು.

1. ಸಾಮಾನ್ಯವಾಗಿ ಹೆಣ್ಣು ಕುರಿಗಳು 9 ರಿಂದ 13 ತಿಂಗಳ ಅವಧಿಯಲ್ಲಿ ಮೊದಲ ಬಾರಿಗೆ ಬೆದೆಗೆ ಬರುತ್ತವೆ.
2. ಹೆಣ್ಣು ಕುರಿಗಳು ಪ್ರಾಯಕ್ಕೆ ಬಂದಿದ್ದರೂ ಸಹ ಅವುಗಳ ಗಾತ್ರ ಮತ್ತು ಮೈಕಟ್ಟನ್ನು ನೋಡಿಕೊಂಡು ಟಗರನ್ನು ಸಂವರ್ಧನೆಗೆ ಬಿಡಬೇಕು.
3. ಸಂವರ್ಧನೆಯ ಕಾರ್ಯವನ್ನು ಕೃತಕಗರ್ಭಧಾರಣೆ ಮೂಲಕ ಮಾಡಬಹುದು ಅಥವಾ ಟಗರನ್ನು ಹೆಣ್ಣು ಕುರಿಯೊಂದಿಗೆ ಸಂತಾನೋತ್ಪತ್ತಿಗೆ ಬಿಡಬಹುದು. ಸಂವರ್ಧನೆಗೆ ಸಾಮಾನ್ಯವಾಗಿ 15 ರಿಂದ 20 ಹೆಣ್ಣು ಕುರಿಗಳಿಗೆ ಒಂದು ಬೀಜದ ಟಗರು ಬೇಕಾಗುತ್ತದೆ.
4. ಕುರಿಗಳ ಗರ್ಭಧಾರಣೆಯ ಅವಧಿ 145-150 ದಿನಗಳು (ಸುಮಾರು 5 ತಿಂಗಳು).
5. ಮರಿ ಈಳಿದ ನಂತರ ಕುರಿಗಳು ಮತ್ತೆ 2 ರಿಂದ 3 ತಿಂಗಳ ಅವಧಿಯಲ್ಲಿ ಬೆದೆಗೆ ಬರುತ್ತವೆ. ಈ ಸಮಯದಲ್ಲಿ ಕುರಿ ಪಾಲಕರು ಜಾಗೃತರಾಗಿದ್ದು ಕುರಿಗಳಿಗೆ ಗರ್ಭ ಕಟ್ಟಿಸಲೇಬೇಕು.
6. ಗರ್ಭಕಟ್ಟಿಸುವ ಕಾಲ ಮಾರ್ಚ್ -ಎಪ್ರಿಲ್ ತಿಂಗಳು, ಇಲ್ಲವೇ ಜುಲೈಯಿಂದ ಅಗಸ್ಟ್ ತಿಂಗಳ ಅಂತ್ಯದವರೆಗೆ. ಈ ಸಮಯದಲ್ಲಿ ಕುರಿಗಳಿಗೆ ಗರ್ಭಕಟ್ಟಿಸಿದರೆ ಅವು ಅಗಸ್ಟ್ ನಿಂದ ಸೆಪ್ಟೆಂಬರ್ ತಿಂಗಳವರೆಗೂ ಹಾಗೂ ಡಿಸೆಂಬರ್ ನಿಂದ ಜನವರಿ ತಿಂಗಳವರೆಗೂ ಮರಿ ಹಾಕುತ್ತವೆ. ಸಾಮನ್ಯವಾಗಿ ಕುರಿಗಳು ಅಗಸ್ಟ್ ನಿಂದ ಜನವರಿ ತಿಂಗಳವರೆಗೆ ಹಾಕುವುದೇ ಹೆಚ್ಚು.
7. ವರ್ಷದಲ್ಲಿ ಎರಡು ಸಾರಿ ಮರಿ ಈಳಿಯುವುದನ್ನು ನಿರೀಕ್ಷಿಸುವುದು ಕಷ್ಟ ಆದರೆ, ಎರಡು ವರ್ಷದ ಅವಧಿಯಲ್ಲಿ ಮೂರು ಬಾರಿ ಮರಿ ಪಡೆಯಬಹುದು.
8. ಉತ್ತಮ ಗುಣಮಟ್ಟದ ಹಾಗೂ ಧೃಡಕಾಯದ ಮರಿಗಳ ಉತ್ಪಾದನೆಗೆ ಸಂಕರಣ ಪದ್ಧತಿ ಅನುಸರಿಸುವುದು ಸೂಕ್ತ ಕ್ರಮ. ಹೆಣ್ಣು ಮತ್ತು ಗಂಡು ಕುರಿಗಳನ್ನು ಬೇರೆ ಬೇರೆ ಹಿಂಡುಗಳಿಂದ ಆಯ್ಕೆ ಮಾಡಿ ಸಂವರ್ಧನೆ ಮಾಡಿಸಬೇಕು. ಈ ಕುರಿಗಳು ಅನುವಂಶೀಯ ರೋಗ-ರುಜಿನಗಳಿಂದ ಮುಕ್ತವಿರಬೇಕು.