ಕುರಿ ಸಾಕಾಣಿಕೆ :

• ಭಾರತವು ಪ್ರಸ್ತುತ 535 ಮಿಲಿಯನ್ ಜಾನುವಾರುಗಳನ್ನು ಹೊಂದಿದ್ದು, ಪ್ರತಿ ವರ್ಷ ಪ್ರತಿಶತ 4 ರಷ್ಟು ಹೆಚ್ಚುತ್ತಿದ್ದು, ಸದ್ಯ ದೇಶದಲ್ಲಿ 20ನೇ ಜಾನುವಾರು ಗಣತಿ 2019-20 ರ ಪ್ರಕಾರ 190 ಮಿಲಿಯನ್ ದನಗಳು (36%), 109 ಮಿಲಿಯನ್ ಎಮ್ಮೆಗಳು (20%), 74 ಮಿಲಿಯನ್ ಕುರಿಗಳು (13%), 149 ಮಿಲಿಯನ್ ಆಡುಗಳು (24%) ಹಾಗೂ ಇತರೇ ಜಾನುವಾರುಗಳು ಇವೆ.
• ಈ ಪಶುಸಂಗೋಪನೆಯು ದೇಶದ ಆರ್ಥಿಕ ಹಾಗೂ ಸಾಮಾಜಿಕ ಅಭಿವೃದ್ಧಿಗೆ ಮಹತ್ವದ ಕಾಣಿಕೆ ನೀಡುತ್ತಿದೆ. ಗ್ರಾಮೀಣ ಭಾರತದಲ್ಲಿ 15-20% ಭೂರಹಿತ ಕುಟಂಬಗಳಿದ್ದು ಇವರು ಪಶುಪಾಲನೆಯನ್ನು ತಮ್ಮ ಜೀವಾನಾಧಾರವಾಗಿಸಿಕೊಂಡಿದ್ದಾರೆ.
• ಭೂಮಿಯನ್ನು ಹೊಂದಿರುವ ದೊಡ್ಡ ಹಾಗೂ ಸಣ್ಣ ರೈತರು ದನ ಮತ್ತು ಎಮ್ಮೆಗಳನ್ನು ಹೆಚ್ಚಾಗಿ ಸಾಕಿದರೆ ಭೂರಹಿತ ರೈತಾಪಿ ಜನರು ವಿಶೇಷವಾಗಿ ಆಡು ಮತ್ತು ಕುರಿಗಳನ್ನು ಅವಲಂಬಿಸಿದ್ದಾರೆ.
• ಕಳೆದ ಐದು ದಶಕಗಳಲ್ಲಿ ಬಹಳಷ್ಟು ಸಣ್ಣ ರೈತರು ಆಡು ಮತ್ತು ಕುರಿ ಸಾಕಾಣಿಕೆಯತ್ತ ವಾಲಿದ್ದು ಒಂದು ವಿಶೇಷ. ಇದಕ್ಕೆ ಮುಖ್ಯ ಕಾರಣ ಕ್ಷೀಣಿಸುತ್ತಿರುವ ಭೂ ಹಿಡುವಳಿ, ಹೆಚ್ಚಾಗಿ ಕಂಡುಬರುತ್ತಿರುವ ಬರಗಾಲ ಎಂದು ವಿಶ್ಲೇಷಿಸಲಾಗಿದೆ.
• ಕುರಿ ಸಾಕಾಣಿಕೆ ಮಾಡಲು ಹೆಚ್ಚು ಖರ್ಚು ಮಾಡಬೇಕಾಗಿಲ್ಲ, ಆದರೆ ಆಧುನಿಕ ತಂತ್ರಜ್ಞಾನ, ಆಹಾರ ವಿಜ್ಞಾನ, ತಳಿಯ ಅಭಿವೃದ್ಧಿ, ಹಾಗೂ ಉತ್ತಮ ಸಂತಾನಭಿವೃದ್ಧಿಯ ವಿಧಾನಗಳನ್ನು ಅಳವಡಿಸಿ ಕುರಿಗಳನ್ನು ಸಾಕಿದರೆ ಹೆಚ್ಚಿನ ಆದಾಯ ಗಳಿಸಬಹುದು.
• ಕರ್ನಾಟಕ ರಾಜ್ಯದಲ್ಲಿ 2019-20 ರ ಜಾನುವಾರು ಗಣತಿ ಪ್ರಕಾರ 110 ಲಕ್ಷ ಕುರಿಗಳು ಮತ್ತು 61 ಲಕ್ಷ ಮೇಕೆಗಳು ಇವೆ. ಮಾನವರಿಗೆ ಆಹಾರ ಮತ್ತು ಉಣ್ಣೆ ಒದಗಿಸುವಲ್ಲಿ ಕುರಿ ಮತ್ತು ಮೇಕೆಗಳ ಪಾತ್ರ ಮಹತ್ವದ್ದಾಗಿದೆ.
• ರಾಜ್ಯದಲ್ಲಿ ಪಶುಸಂಗೋಪನೆ ಕ್ಷೇತ್ರವು ಪ್ರತಿಶತ 5ರ ದರದಲ್ಲಿ ದಾಪುಗಾಲು ಇಡುತ್ತಿದ್ದು, ಶೇಕಡಾ 4.1% ರಷ್ಟು ರಾಷ್ಟ್ರೀಯ ಉತ್ಪನ್ನ ಈ ಕ್ಷೇತ್ರದಿಂದ ಬರುತ್ತಿದೆ.
• ರಾಜ್ಯದಲ್ಲಿ ಪಶುಸಂಗೋಪನಾ ಅಭಿವೃದ್ಧಿಗಾಗಿ ಹಲವು ಸರ್ಕಾರಿ ಹಾಗೂ ಸರ್ಕಾರೇತರ ಸಂಸ್ಥೆಗಳು ಕಾರ್ಯನಿರ್ವಹಿಸುತ್ತಿವೆ. ಪಶುಪಾಲನೆ ಮತ್ತು ಪಶುವೈದ್ಯ ಸೇವಾ ಇಲಾಖೆ ಅಡಿ ಹಲವು ತರಹದ ಸಂಸ್ಥೆಗಳು ಜಾನುವಾರುಗಳ ಆರೋಗ್ಯ, ರೈತರಿಗೆ ಪ್ರಾಯೋಗಿಕ ಜಾನುವಾರು ಉತ್ಪಾದನಾ ತರಬೇತಿ, ವಿಸ್ತರಣಾ ಸೇವೆಗಳನ್ನು ನೀಡುವುದರಲ್ಲಿ ಕಾರ್ಯನಿರತವಾಗಿದ್ದು ಹಲವು ಸಾಮಾಜಿಕ ಆರ್ಥಿಕ ಅಭಿವೃದ್ಧಿ ಯೋಜನೆಗಳ ಅನುಷ್ಟಾನವನ್ನು ಮಾಡುತ್ತಿವೆ.
• ಸದ್ಯ ರಾಜ್ಯದಲ್ಲಿ 665 ಪಶು ಆಸ್ಪತ್ರೆಗಳು, 2135 ಪಶು ಚಿಕಿತ್ಸಾಲಯಗಳು, 176 ಸಂಚಾರಿ ಪಶು ಚಿಕಿತ್ಸಾಲಯಗಳು, 1209 ಪ್ರಾಥಮಿಕ ಪಶು ಚಿಕಿತ್ಸಾ ಕೇಂದ್ರಗಳು, 239 ಕೃತಕ ಗರ್ಭಧಾರಣೆ ಕೇಂದ್ರಗಳು, 52 ಕುರಿ ಮತ್ತು ಉಣ್ಣೆ ಅಭಿವೃಧ್ಧಿ ಕೇಂದ್ರಗಳು, ಹಲವು ಜಾನುವಾರು ಫಾರ್ಮಗಳು, ರೋಗಪತ್ತೆ ಪ್ರಯೋಗಾಲಯಗಳು ಇತ್ಯಾದಿ ಕಾರ್ಯನಿರ್ವಹಿಸುತ್ತಿವೆ.

ಆರ್ಥಿಕ ಸ್ವಾಲಂಬನೆಗಾಗಿ ಕುರಿ ಸಾಕಾಣಿಕೆ

• ಗ್ರಾಮೀಣ ಪ್ರದೇಶಗಳನ್ನೊಳಗೊಂಡ ನಮ್ಮ ದೇಶದಲ್ಲಿ ಹೆಚ್ಚಿನ ಜನ ಸಣ್ಣ ರೈತರು, ಅತಿ ಸಣ್ಣ ರೈತರು, ಕೃಷಿ ಕಾರ್ಮಿಕರಾಗಿದ್ದು, ತಮ್ಮ ಆದಾಯ ರೂಪಿಸಿಕೊಳ್ಳುವ ಸಲುವಾಗಿ ಕುರಿ-ಮೇಕೆ ಸಾಕಾಣಿಕೆಯನ್ನು ಹೆಚ್ಚಾಗಿ ಅವಲಂಬಿಸಿರುತ್ತಾರೆ.
• ಕುರಿ ಸಾಕಾಣಿಕೆಯು ತನ್ನ ಅವಲಂಬಿತರಿಗೆ ನಿರಂತರ, ನಿಖರ ಹಾಗೂ ನಿದಿ೯ಷ್ಟ ಆದಾಯವನ್ನು ಒದಗಿಸುವ ಮೂಲಕ ಆರ್ಥಿಕ ಭದ್ರತೆಗೆ ಸಹಕಾರಿಯಾಗಿದೆ. ಕುರಿ ಮತ್ತು ಮೇಕೆ ಸಾಕಾಣಿಕೆಯು ಹೈನುಗಾರಿಕೆಯ ನಂತರದ ಸ್ಥಾನ ಪಡೆದಿದ್ದು, ನಮ್ಮ ದೇಶದ ಸಾಮಾಜಿಕ ಹಾಗೂ ಆರ್ಥಿಕ ಉನ್ನತಿಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.
• ಅಧಿಕ ಬಂಡವಾಳ ಬಯಸದ, ವಿಶೇಷ ತರಬೇತಿ ಅಗತ್ಯವಿಲ್ಲದ, ಸರಳ, ಸುಲಭ ಹಾಗೂ ಲಾಭದಾಯಕ ಕಸುಬು ಇದಾಗಿದೆ. ಕುರಿಗಳು ಮನುಷ್ಯನಿಗೆ ಬೇಡವಾದ ವಸ್ತುಗಳನ್ನು ಉಪಯೋಗಿಸಿಕೊಂಡು ಮನುಷ್ಯನಿಗೆ ಅಗತ್ಯವಾಗಿ ಬೇಕಾದ ಮಾಂಸ, ಗೊಬ್ಬರ, ಚರ್ಮ ಮುಂತಾದವುಗಳನ್ನು ಒದಗಿಸುತ್ತಿವೆ.
• ಶ್ರೇಷ್ಠ ದರ್ಜೆಯ ಉಣ್ಣೆಯ ತಳಿ ಕುರಿಗಳಿಂದ ಉತ್ಪಾದನೆಯಾಗುವ ಉಣ್ಣೆಯಿಂದ ಕಾರ್ಪೆಟ್, ಉಲನ್ ಬಟ್ಟೆಗಳ ಉತ್ಪಾದನಾ ಉದ್ಯಮ ನಡೆಯುತ್ತಿದ್ದು, ಸಾವಿರಾರು ಜನರಿಗೆ ಉದ್ಯೋಗ ಅವಕಾಶಗಳೂ ಲಭಿಸಿವೆ.
• ಕುರಿ ಹಿಕ್ಕೆಯಿಂದ ಲಭ್ಯವಾಗುವ ಗೊಬ್ಬರವು ಅತಿ ಹೆಚ್ಚಿನ ಸಾರಾಂಶವನ್ನು ಒದಗಿಸುವ ಉತ್ಕೃಷ್ಠ ಗೊಬ್ಬರವಾಗಿದ್ದು, ಕುರಿಗಳು ಹಾಕುವ ಹಿಕ್ಕೆ ಹಾಗೂ ಮೂತ್ರದಿಂದ ಭೂಮಿಯ ಫಲವತ್ತತೆಯನ್ನೂ ಹೆಚ್ಚಿಸಬಹುದು.
• ನಮ್ಮ ದೇಶದ ಕುರಿ ತಳಿಗಳು ವೈವಿಧ್ಯತೆಯಿಂದ ಕೂಡಿದ್ದು, ವಿವಿಧ ಆಧುನಿಕ ತಾಂತ್ರಿಕತೆಯನ್ನು ಅಳವಡಿಸುವ ಮೂಲಕ ಅವುಗಳ ಸಾಮರ್ಥ್ಯವನ್ನು ವೃದ್ಧಿಸಿ ಉತ್ಪಾದನೆಯನ್ನು ಉತ್ತಮಪಡಿಸಬಹುದು.
• ಈ ನಿಟ್ಟಿನಲ್ಲಿ ದಿನೇ ದಿನೇ ಕುರಿ ಸಾಕಾಣಿಕೆಯು ಪ್ರಾಮುಖ್ಯತೆಯನ್ನು ಪಡೆಯುತ್ತಿದ್ದು, ಅಧಿಕ ಮಾಂಸದ ಇಳುವರಿ ನೀಡುವ ಸುಧಾರಿತ ತಳಿಗಳ ಸಾಕಾಣಿಕೆಯತ್ತ ಒಲವು ಹೆಚ್ಚಾಗತೊಡಗಿದೆ. ಈ ನಿಟ್ಟಿನಲ್ಲಿ ಯೋಜಿತ ಹಾಗೂ ವ್ಯವಸ್ಥಿತ ತಳಿ ಅಭಿವೃದ್ಧಿ ಕ್ರಮಗಳನ್ನು ಅನುಸರಿಸುವ ಮೂಲಕ ಉತ್ಪಾದನೆಯನ್ನು ಹೆಚ್ಚಿಸಬಹುದು.

ಕುರಿ ಸಾಕಾಣಿಕೆಯ ಉಪಯೋಗಗಳು/ಅನುಕೂಲಗಳು:

• ಕುರಿಗಳನ್ನು ಸಾಕಲು ದುಬಾರಿ ಕಟ್ಟಡಗಳು ಅಗತ್ಯವಿಲ್ಲ ಮತ್ತು ಮತ್ತೊಂದೆಡೆ, ಇತರ ರೀತಿಯ ಜಾನುವಾರುಗಳಿಗಿಂತ ಕಡಿಮೆ ಶ್ರಮ ಬೇಕಾಗುತ್ತದೆ. ಅಡಿಪಾಯದ ಸ್ಟಾಕ್ ತುಲನಾತ್ಮಕವಾಗಿ ಅಗ್ಗವಾಗಿದೆ ಮತ್ತು ಹಿಂಡನ್ನು ವೇಗವಾಗಿ ಹೆಚ್ಚಿಸಬಹುದು.
• ಕುರಿಗಳು ತಾವು ತಿನ್ನುವ ಮೇವನ್ನು ಮಾಂಸ ಮತ್ತು ಉಣ್ಣೆಯಾಗಿ ಆರ್ಥಿಕವಾಗಿ ಪರಿವರ್ತಿಸುತ್ತವೆ.
• ಕುರಿಗಳು ಇತರ ರೀತಿಯ ಜಾನುವಾರುಗಳಿಗೆ ಹೋಲಿಸಿದರೆ ವಿವಿಧ ರೀತಿಯ ಸಸ್ಯಗಳನ್ನು ತಿನ್ನುತ್ತವೆ. ಇದು ಅವುಗಳನ್ನು ಅತ್ಯುತ್ತಮ ಕಳೆ ನಾಶಕವನ್ನಾಗಿ ಮಾಡುತ್ತದೆ. ಅವುಗಳ ತುಟಿಗಳ ರಚನೆಯು ಸುಗ್ಗಿಯ ಸಮಯದಲ್ಲಿ ಕಳೆದುಹೋದ ಧಾನ್ಯಗಳನ್ನು ಸ್ವಚ್ಛಗೊಳಿಸಲು ಸಹಾಯ ಮಾಡುತ್ತದೆ ಮತ್ತು ಹೀಗಾಗಿ, ತ್ಯಾಜ್ಯ ಆಹಾರವನ್ನು ಲಾಭದಾಯಕ ಉತ್ಪನ್ನಗಳಾಗಿ ಪರಿವರ್ತಿಸುತ್ತದೆ.
• ಮೇಕೆಗಳಿಗಿಂತ ಭಿನ್ನವಾಗಿ, ಕುರಿಗಳು ಯಾವುದೇ ಮರವನ್ನು ಅಷ್ಟೇನೂ ಹಾನಿಗೊಳಿಸುವುದಿಲ್ಲ.
• ಉಣ್ಣೆ, ಮಾಂಸ ಮತ್ತು ಗೊಬ್ಬರದ ಉತ್ಪಾದನೆಯು ಮೂರು ವಿಭಿನ್ನ ಆದಾಯದ ಮೂಲಗಳಾಗಿವೆ.
• ಭಾರತದಲ್ಲಿ ಕುರಿ ಮಾಂಸದ ಬಗ್ಗೆ ಯಾವುದೇ ಸಮುದಾಯವು ಯಾವುದೇ ಪೂರ್ವಾಗ್ರಹವನ್ನು ಹೊಂದಿಲ್ಲ ಮತ್ತು ಕುರಿ ಉತ್ಪಾದನೆಗೆ ಉತ್ತಮ ತಳಿಗಳ ಅಭಿವೃದ್ಧಿಯು ಆರ್ಥಿಕತೆಯಲ್ಲಿ ಹೆಚ್ಚಿನ ವ್ಯಾಪ್ತಿಯನ್ನು ಹೊಂದಿರುತ್ತದೆ.
• ಪರಿಸರ ಮತ್ತು ಕಳಪೆ ನಿರ್ವಹಣಾ ಪದ್ಧತಿಗಳಿಗೆ ಚೆನ್ನಾಗಿ ಅಳವಡಿಸಿಕೊಂಡಿದೆ.
• ಮಾಂಸದ ದರವು ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ ಮತ್ತು ಅದಕ್ಕೆ ಅನುಗುಣವಾಗಿ ಬೇಡಿಕೆ ಹೆಚ್ಚುತ್ತಿದೆ.
• ಕುರಿಯು ಗಭ೯ಧರಿಸಿದಾಗ ಪ್ರತಿ ಕುರಿಯು ಸರಾಸರಿ 1-2 ಮರಿಗಳನ್ನು ಪಡೆಯುವುದು
• ಕುರಿಗಳ ಹಿಂಡಿನಿಂದ ಗೊಬ್ಬರದ ಮೌಲ್ಯವನ್ನು ಹೆಚ್ಚಿಸಬಹುದು.

ಜಗತ್ತಿನಾದ್ಯಂತವಿರುವ ಕುರಿಗಳನ್ನು ಅವುಗಳಿಂದ ಬರುವ ಉತ್ಪನ್ನಗಳ ಅನುಗುಣವಾಗಿ ಮೂರು ವಿಧಗಳಾಗಿ ವಿಂಗಡಿಸಬಹುದು.

1. ಉಣ್ಣೆ ತಳಿಗಳು
2. ಮಾಂಸದ ತಳಿಗಳು
3. ಮಾಂಸ ಮತ್ತು ಉಣ್ಣೆ ತಳಿಗಳು.

1) ಉಣ್ಣೆ ತಳಿಗಳು:

ಈ ತಳಿಗಳಿಂದ ಹೆಚ್ಚಿನ ಪ್ರಮಾಣದಲ್ಲಿ ಉತ್ತಮ ಉಣ್ಣೆ ದೊರೆಯುತ್ತದೆ. ಈ ತಳಿಗಳು ಹೆಚ್ಚಾಗಿ ಅಮೆರಿಕಾ, ಆಸ್ಟ್ರೇಲಿಯಾ, ಸ್ಪೆನ್ ಹಾಗೂ ರಷ್ಯಾ ದೇಶಗಳಲ್ಲಿ ಕಂಡು ಬರುತ್ತವೆ. ಈ ವರ್ಗದಲ್ಲಿರುವ ಮುಖ್ಯ ತಳಿಗಳು ರಾಮ್ ಬೋಲೇಟ್, ರೋಮಿನಿ ಮಾರ್ಷ್, ಮೆರಿನೊ, ನೀಲಗಿರಿ, ಭಾರತ್ ಮೆರಿನೊ ಇತ್ಯಾದಿ.

2) ಮಾಂಸದ ತಳಿಗಳು:

ಈ ತಳಿಗಳಿಂದ ಉತ್ತಮ ಗುಣಮಟ್ಟದ ಮಾಂಸ ಹೆಚ್ಚು ಪ್ರಮಾಣದಲ್ಲಿ ದೊರೆಯುತ್ತದೆ. ಇವು ಶೀಘ್ರವಾಗಿ ಬೆಳೆಯುವ ತಳಿಗಳು. ಈ ವರ್ಗದಲ್ಲಿ ಬರುವ ಮುಖ್ಯ ತಳಿಗಳು: ಡಾರ್‌ಸೆಟ್ ಹಾರ್ನ, ಸೌತಡೌನ್, ಮಂಡ್ಯ (ಬಂಡೂರ), ನೆಲ್ಲೂರು ಇತ್ಯಾದಿ.

3) ಮಾಂಸ ಮತ್ತು ಉಣ್ಣೆ ತಳಿಗಳು:

ಈ ತಳಿಗಳಿಂದ ಉತ್ತಮ ಮಾಂಸ ಹಾಗೂ ಉಣ್ಣೆ ಎರಡೂ ದೊರೆಯುತ್ತವೆ. ಮುಖ್ಯವಾದ ತಳಿಗಳು ಕಾರಿಡೇಲ್ ಮತ್ತು ಲ್ಯೆಸಸ್ಟರ್. ಈ ಕುರಿ ತಳಿಗಳು ಆಯಾ ದೇಶದ ಪರಿಸರಕ್ಕೆ ಚೆನ್ನಾಗಿ ಹೊಂದಿಕೊಂಡಿವೆ. ಭಾರತದ ಕುರಿಗಳಿಂದ ಉತ್ತಮ ಮಟ್ಟದ ಉಣ್ಣೆ ದೊರೆಯುವುದಿಲ್ಲ. ಹಾಗೆಯೇ, ಉಣ್ಣೆಯ ಇಳುವರಿ ಹಾಗೂ ಮಾಂಸದ ಗುಣಮಟ್ಟವು ಕೂಡ ಕಡಿಮೆಯಿದೆ.

ಇತ್ತೀಚಿನ ವರ್ಷಗಳಲ್ಲಿ ಭಾರತ ಸಹ ಉತ್ತಮ ಉಣ್ಣೆ ಕೊಡುವ ತಳಿಗಳನ್ನು ಸಂಕರಣ, ಸಂವರ್ಧನೆ ಹಾಗೂ ಆಯ್ಕೆಯ ಪರಿಶ್ರಮದಿಂದ ಬಿಡುಗಡೆ ಮಾಡಿದೆ. ಇವುಗಳಲ್ಲಿ ಮುಖ್ಯವಾದ ತಳಿಗಳು: ಕಾಶ್ಮೀರಿ ಮೆರಿನೊ, ಅವಿವಸ್ತ, ಅವಿಕಾಲಿನ್ ಇತ್ಯಾದಿ.

ಮಾಂಸದ ತಳಿಯ ವಿಶೇಷ ಗುಣಗಳು:

1. ತೀವ್ರಗತಿಯ ಬೆಳವಣೆಗೆ.
2. ಆಹಾರವನ್ನು ಪೋಲು ಮಾಡದೆ ಜೀರ್ಣ ಮಾಡಿಕೊಂಡು ಕೊಬ್ಬು ಬೆಳೆಯುವಿಕೆ.
3. ಸುಮಾರು 6 ತಿಂಗಳ ಅವಧಿಯಲ್ಲಿ 18 ರಿಂದ 20 ಕೆ.ಜಿ. ದೇಹದ ತೂಕ ಪಡೆಯುವ ಸಾಮರ್ಥ್ಯ.
4. ಪ್ರತಿ ಸಾರಿ ಒಂದಕ್ಕಿಂತ ಹೆಚ್ಚು ಮರಿ ಹಾಕುವಿಕೆ ಹಾಗೂ ತಾಯಿ ತನ್ನ ಮರಿಗಳಿಗೆ ಸಮಪರ್ಕವಾಗಿ ಹಾಲು ಕುಡಿಸುವ ಮತ್ತು ಅವುಗಳ ಹಿತರಕ್ಷಣೆ ಮಾಡುವ ಗುಣಧರ್ಮಗಳನ್ನು ಹೊಂದಿವೆ.
5. ಆರು ತಿಂಗಳ ನಂತರ ಉತ್ಕೃಷ್ಟವಾದ, ಮೃದುವಾದ, ಸುವಾಸನೆಯುಳ್ಳ, ಮಾಂಸವನ್ನು ಉತ್ಪಾದಿಸಬಹುದು. ಮಾಂಸದ ಇಳುವರಿ ಶೇಕಡಾ 45 ರಿಂದ 50 ರಷ್ಟಿದ್ದು, ಮಾಂಸವು ತಿನ್ನಲು ತುಂಬಾ ರುಚಿಕರವಾಗಿದೆ.

ಉಣ್ಣೆ ತಳಿಯ ವಿಶೇಷ ಗುಣಗಳು:

1. ಮಾಂಸದ ತಳಿಗಳಂತೆ ಶೀಘ್ರವಾಗಿ ಬೆಳೆಯುವ, ಆಹಾರ ಜೀರ್ಣಿಸಿಕೊಳ್ಳುವ ಮರಿಗಳನ್ನು ಸಮರ್ಪಕವಾಗಿ ಬೆಳೆಸುವ ಗುಣವಿದೆ.
2. ಕುರಿಗಳ ಮೈಮೇಲೆ ಒತ್ತಾಗಿ, ಹುಲುಸಾಗಿ, ನುಣಪಾಗಿ ಉಣ್ಣೆ ಬೆಳೆದಿರಬೇಕು. ಉಣ್ಣೆಯ ಎಳೆಗಳು ಹೆಚ್ಚು ಉದ್ದವಾಗಿದ್ದು ಉಬ್ಬು ತಗ್ಗುಗಳಿಂದ ಕೂಡಿರಬೇಕು. ಆದರೆ ಎಳೆಗಳು ಹೆಚ್ಚು ದಪ್ಪವಾಗಿರಬಾರದು ಮತ್ತು ಕೂದಲಿನ ಅಂಶವಿರಬೇಕು.
3. ಉಣ್ಣೆಯು ಬಿಳುಪಾಗಿದ್ದು, ಹೊಳೆಯುತ್ತಿರಬೇಕು ಹಾಗೂ ಬೇರೆ ಎಳೆಗಳೊಂದಿಗೆ ಮಿಶ್ರ ಮಾಡಿದಾಗ ಒಂದು ಗೂಡುವಂತಿರಬೇಕು.
4. ಉಣ್ಣೆ ಇಳುವರಿ ಅಧಿಕವಾಗಿರಬೇಕು.

ತಳಿ ಆಯ್ಕೆಯಲ್ಲಿ ಅನುಸರಿಸಬೇಕಾದ ಅಂಶಗಳು:

ಲಾಭದಾಯಕ ಕುರಿ ಸಾಕಣೆಯಲ್ಲಿ ಉತ್ತಮ ತಳಿ ಹೆಣ್ಣು ಕುರಿಯ ಆಯ್ಕೆ ಪ್ರಮುಖವಾದ ಪಾತ್ರವನ್ನು ವಹಿಸುತ್ತದೆ. ಈ ನಿಟ್ಟಿನಲ್ಲಿ ಆಯಾ ಪ್ರಾಂತ್ಯ ಹಾಗೂ ಲಭ್ಯವಿರುವ ಇತರ ಸೌಕರ್ಯಗಳಿಗೆ ಅನುಗುಣವಾಗಿ ಸೂಕ್ತ ತಳಿಯನ್ನು ಈ ಕೆಳಗಿನಂತೆ ಆಯ್ಕೆ ಮಾಡಬಹುದಾಗಿದೆ.

1. ಆಯ್ಕೆ ಮಾಡುವ ಕುರಿ ಎಳೆಯ ವಯಸ್ಸಿನದ್ದಾಗಿದ್ದು, ಆಯಾ ತಳಿಯ ಗುಣ ಲಕ್ಷಣಗಳನ್ನು ಹೊಂದಿರಬೇಕು.
2. ಹೆಚ್ಚಿನ ಮೇವು ಸೇವಿಸಿ ಉತ್ತಮ ತೂಕಗಳಿಸುವ ಗುಣ ಹೊಂದಿಬೇಕು.
3. ಬೇಗ ಬೆಳೆವಣೆಗೆ ಹೊಂದಿ ಪ್ರಾಯಕ್ಕೆ ಬರುವ ಮೂಲಕ ಜೀವಮಾನದಲ್ಲಿ ಹೆಚ್ಚಿನ ಮರಿಗಳನ್ನು ನೀಡುವ ಗುಣ ಹೊಂದಿರಬೇಕು.
4. ಮರಿ ಹಾಕಿದ ನಂತರ ಶೀಘ್ರವಾಗಿ ಹಾಗೂ ಸಕಾಲದಲ್ಲಿ ಮತ್ತೆ ಸಂತಾನೋತ್ಪತ್ತಿಗೆ ಸಿದ್ದವಾಗುವಂತಿರಬೇಕು.
5. ಅನುವಂಶೀಯ ರೋಗ-ರುಜಿನಗಳು ಇಲ್ಲದಿರುವ ಬಗ್ಗೆ ಖಚಿತಪಡಿಸಿಕೊಳ್ಳಬೇಕು.
6. ವಿವಿಧ ತಳಿಗಳಲ್ಲಿ ಅವಳಿ ಮರಿಗಳ ಹಾಕುವಿಕೆಯ ಪ್ರಮಾಣ, ಮರಿಗಳ ಪಾಲನೆಗೆ ಅವಶ್ಯಕವಾದ ಹಾಲುಣಿಸುವ ಸಾಮರ್ಥ್ಯದ ಬಗೆ ಗಮನಹರಿಸುವುದು ಸೂಕ್ತ.
7. ಇತ್ತೀಚಿನ ದಿನಗಳಲ್ಲಿ ಸ್ಥಳಿಯ ತಳಿಗಳನ್ನು ಹೊರತುಪಡಿಸಿ ವಿದೇಶಿ ಮತ್ತು ಮಿಶ್ರ ತಳಿಗಳ ಸಾಕಣೆಗಾಗಿ ರೈತರು ಆಸಕ್ತಿ ತೋರಿಸುತ್ತಿದ್ದಾರೆ. ಅಂತಹ ತಳಿಗಳ ಸ್ಥಳಿಯ ವಾತಾವರಣಕ್ಕೆ ಹೊಂದಿಕೊಳ್ಳುವಿಕೆ, ಆಹಾರ ಕ್ರಮ, ಸಂತಾನೋತ್ಪತ್ತಿಯ ಸಮಸ್ಯೆಗಳ ಕುರಿತು ಸಂಪೂರ್ಣವಾಗಿ ಮಾಹಿತಿ ಪಡೆದು ಸಾಕಾಣಿಕೆಗಾಗಿ ಮುಂದಾಗುವುದು ಒಳಿತು.
8. ಸಾಕಾಣಿಕೆ ಕ್ರಮದ (ಹೊರಗೆ ಮೇಯಲು ಬಿಡುವ/ಕೊಟ್ಟಿಗೆ ಪದ್ಧತಿ) ಅನುಗುಣವಾಗಿ ತಳಿ ಆಯ್ಕೆ ಮಾಡುವುದು ಉತ್ತಮ ಕ್ರಮ.
9. ಸಾಕಾಣಿಕೆಯ ಉದ್ದೇಶಕ್ಕೆ (ಮಾಂಸ/ಉಣ್ಣೆ) ಅನುಗುಣವಾಗಿ ಮತ್ತು ಆಯಾ ಪ್ರಾಂತ್ಯದಲ್ಲಿ ಜನಪ್ರಿಯವಿರುವ ತಳಿಗಳ ಮಾಹಿತಿ ಪಡೆದುಕೊಳ್ಳಬೇಕು. ಆ ತಳಿಯಿಂದ ದೊರಕುವ ಉತ್ಪನ್ನಕ್ಕೆ ಸ್ಥಳಿಯವಾಗಿ ಇರುವ ಮಾರುಕಟ್ಟೆಯ ಲಭ್ಯತೆ ಬಗ್ಗೆ ಕೂಡ ಖಚಿತ ಪಡಿಸಿಕೊಳ್ಳಬೇಕು.