ಸಂತಾನೋತ್ಪತ್ತಿ:

ಹಂದಿಗಳ ಸಂತಾನೋತ್ಪತ್ತಿ ನಿರ್ವಹಣೆ

• ಸಂತಾನೋತ್ಪತ್ತಿಗೆ ಶಿಫಾರಸು ಮಾಡಲಾದ ಹಂದಿಯು ಸೋಂಕಿನಿಂದ ಮುಕ್ತವಾಗಿರಬೇಕು ಮತ್ತು ಹೆಚ್ಚಿನ ಆನುವಂಶಿಕ ಮೌಲ್ಯವನ್ನು ಹೊಂದಿರಬೇಕು.
• ಉತ್ತಮ ಪೌಷ್ಟಿಕಾಂಶ ನಿರ್ವಹಣೆಯು ಹಂದಿಯನ್ನು 8 ರಿಂದ 9 ತಿಂಗಳವರೆಗೆ ಲೈಂಗಿಕ ಪ್ರಬುದ್ಧತೆಯನ್ನು ತಲುಪಲು ಮತ್ತು 60 ರಿಂದ 70 ಕಿ.ಗ್ರಾಂ. ದೇಹದ ತೂಕವನ್ನು ಪಡೆಯಲು ಸಹಾಯ ಮಾಡುತ್ತದೆ, ಇದು ಸಂತಾನೋತ್ಪತ್ತಿ ಉದ್ದೇಶಕ್ಕಾಗಿ ಶಿಫಾರಸು ಮಾಡಲಾದ ಸೂಕ್ತ ತೂಕವಾಗಿದೆ.
• ಹಂದಿಗಳು ಪ್ರತಿ 16-20 ದಿನಗಳಿಗೊಮ್ಮೆ ಬೆದೆಗೆ ಬರುತ್ತವೆ. ಬೆದೆಯ ಅವಧಿಯಲ್ಲಿ ಯೋನಿಯಿಂದ ದಪ್ಪ ಲೋಳೆಯ ಸ್ರವಿಸುವಿಕೆ ಇರುತ್ತದೆ. ಶಾಖ ಪ್ರಾರಂಭವಾದ ನಂತರ 2-3 ದಿನಗಳವರೆಗೆ ಈ ಸ್ರವಿಸುವಿಕೆ ಕಂಡುಬರುತ್ತದೆ. ಬಾಹ್ಯ ಯೋನಿಯ ಊತ ಮತ್ತು ಒಳಗೆ ರಕ್ತ ಸ್ರವಿಸುವಿಕೆ ಕಂಡುಬರುತ್ತದೆ. ಈ ಸಮಯದಲ್ಲಿ ಹಂದಿಗಳು ಸಂಯೋಗಕ್ಕೆ ಸಹಕರಿಸುತ್ತವೆ. ಈಸ್ಟ್ರಸ್(ಬೆದೆ) ಪ್ರಾರಂಭವಾದ 2 ದಿನಗಳ ನಂತರ ಹೆಚ್ಚಿನ ಆನುವಂಶಿಕ ಮೌಲ್ಯದ ಹಂದಿಯನ್ನು ಬಳಸಿಕೊಂಡು ಸಂಯೋಗ ನಡೆಸಿದರೇ, ಗರ್ಭಧಾರಣೆಯ ಸಾಧ್ಯತೆಗಳು ಹೆಚ್ಚು.
• ಸಂಯೋಗದ ನಂತರ, ಗಂಡು ಹಂದಿಯನ್ನು ಹೆಣ್ಣು ಹಂದಿಯಿಂದ ಬೇರ್ಪಡಿಸಬಾರದು. ಗರ್ಭಧಾರಣೆಯ ದೃಢೀಕರಣದ ನಂತರವೇ, ಸಂತಾನೋತ್ಪತ್ತಿಯ ಹಂದಿಗಳನ್ನು ಬೇರ್ಪಡಿಸಬೇಕು.
• ಹೆಣ್ಣು ಹಂದಿ ಶಾಖದಲ್ಲಿ ಇರದಿದ್ದರೇ, ಅವುಗಳು ಸಂಯೋಗಕ್ಕೆ ಸಹಕರಿಸುವುದಿಲ್ಲ, ಬದಲಾಗಿ ಅವು ಗಂಡು ಹಂದಿಯ ಜೋಡಿ ಹೋರಾಡುತ್ತವೆ, ಕಚ್ಚುತ್ತವೆ ಮತ್ತು ಬೆನ್ನಟ್ಟುತ್ತವೆ.

ಸಂತಾನೋತ್ಪತ್ತಿಗಾಗಿ ಗಂಡು ಹಂದಿಯ ಆಯ್ಕೆ

• ಆಯ್ಕೆಯು ಪ್ರಾಥಮಿಕವಾಗಿ ದೇಹದ ತೂಕ, ಗಾತ್ರ ಮತ್ತು ಬೆಳವಣಿಗೆಯ ದರವನ್ನು ಆಧರಿಸಿದೆ.
• ಸಂತಾನೋತ್ಪತ್ತಿಯ ಹಂದಿಯು ಲೈಂಗಿಕ ಪ್ರಬುದ್ಧತೆಯನ್ನು ಬೇಗನೇ ತಲುಪಬೇಕು ಹಾಗೂ ಹೆಚ್ಚಿನ ಸಂಖ್ಯೆಯ ಸಂತತಿಯನ್ನು ಉತ್ಪಾದಿಸುವ, ಪೋಷಕಾಂಶಗಳ ಹೆಚ್ಚಿನ ಚಯಾಪಚಯ ಕ್ರಿಯೆ ಮತ್ತು ಉತ್ತಮ ಗುಣಮಟ್ಟದ ಮಾಂಸವನ್ನು ಉತ್ಪಾದಿಸುವ ಅನುವಂಶಿಕ ಸಾಮರ್ಥ್ಯವನ್ನು ಹೊಂದಿರಬೇಕು.
• ಅಂತಹ ಗುಣಲಕ್ಷಣಗಳನ್ನು ಆನುವಂಶಿಕವಾಗಿ ಪಡೆದಿರುವುದಲ್ಲದೇ, ಅದು ಸ್ಥಳೀಯ ಪರಿಸರದ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವಂತಿರಬೇಕು.
• ಹಂದಿ ಆನುವಂಶಿಕ ಕಾಯಿಲೆಗಳಿಂದ ಮತ್ತು ಸಾಂಕ್ರಾಮಿಕ ರೋಗಗಳಿಂದ ಮುಕ್ತವಾಗಿರಬೇಕು.
• ಒಳಸಂತಾನೋತ್ಪತ್ತಿಯನ್ನು ತಪ್ಪಿಸಲು ಹಂದಿಗಳನ್ನು ಆನುವಂಶಿಕವಾಗಿ ಸಂಬಂಧಿತ ಇತರ ಹಂದಿಗಳೊಂದಿಗೆ (ಸಹೋದರರು ಮತ್ತು ಸಹೋದರಿಯರು) ಸಂಯೋಗ ಮಾಡಿಸಬಾರದು.

ಸಂತಾನೋತ್ಪತ್ತಿಗಾಗಿ ಹೆಣ್ಣು ಹಂದಿಗಳ ಆಯ್ಕೆ

• ಹಂದಿಯ ಬೆಳವಣಿಗೆ ವಯಸ್ಸಿಗೆ ಅನುಗುಣವಾಗಿರಬೇಕು. ಇದು 8 ರಿಂದ 9 ತಿಂಗಳುಗಳಲ್ಲಿ 70 ರಿಂದ 80 ಕಿ.ಗ್ರಾಂ. ತಲುಪಬೇಕು.
• ಹೆಚ್ಚಿನ ಮರಿಗಳನ್ನು ಉತ್ಪಾದಿಸುವ ಸಾಮರ್ಥ್ಯ, ಹಂದಿಮರಿಗಳಿಗೆ ಹಾಲುಣಿಸುವ ಲಕ್ಷಣ, ಉತ್ತಮ ತಾಯಿಯ ಸಾಮರ್ಥ್ಯ ಮತ್ತು ಪರಭಕ್ಷಕಗಳಿಂದ ಸಂತತಿಯನ್ನು ರಕ್ಷಿಸುವ ಸಾಮಥ್ಯ೯ ಹೊಂದಿರಬೇಕು.
• ಅನುವಂಶಿಕ ಮತ್ತು ಸಾಂಕ್ರಾಮಿಕ ರೋಗಗಳಿಂದ ಮುಕ್ತವಾಗಿರಬೇಕು. ಆರೋಗ್ಯಕರ ಹಂದಿಮರಿಗಳನ್ನು ಪಡೆಯಲು ಹಾಗೂ ಒಳಸಂತಾನೋತ್ಪತ್ತಿಯನ್ನು ತಪ್ಪಿಸಲು ಸಂಬಂಧಿತ ಹಂದಿಗಳೊಂದಿಗೆ ಸಂಯೋಗ ಮಾಡಿಸಬಾರದು.
• ಗರ್ಭಧಾರಣೆಯ ದೃಢೀಕರಣದ ನಂತರ, ಹಂದಿಗಳನ್ನು ಹಿಂಡಿನಿಂದ ಬೇರ್ಪಡಿಸಿ ಸುಲಭವಾಗಿ ಜೀರ್ಣವಾಗುವ ಶಕ್ತಿಶಾಲಿ ಆಹಾರವನ್ನು ನೀಡಬೇಕು. ಗರ್ಭಿಣಿ ಹಂದಿಗಳ ಬಗ್ಗೆ ಕಾಳಜಿ ವಹಿಸಬೇಕು.
• ಹೆರಿಗೆಯ ಸಮಯದಲ್ಲಿ ಯಾವುದೇ ಸಮಸ್ಯೆಗಳಿದ್ದರೆ ಪಶುವೈದ್ಯರನ್ನು ಸಂಪರ್ಕಿಸಬೇಕು.

ಹಾಲುಣಿಸುವ ಹಂದಿ ಮತ್ತು ಹಂದಿಮರಿಗಳ ನಿರ್ವಹಣೆ

1. ಗರ್ಭಧಾರಣೆಯ ಕೊನೆಯ ಹಂತದಲ್ಲಿ (ಅಂದರೆ ಗರ್ಭಧಾರಣೆಯ 90 ದಿನಗಳ ನಂತರ) ಹಂದಿಯನ್ನು ಹೆರಿಗೆಗೆ 2 ವಾರಗಳ ಮೊದಲು ಹೆರಿಗೆಯ ಕೊಟ್ಟಿಗೆಗೆ ಬೇರ್ಪಡಿಸಬೇಕು. ಆರಾಮಕ್ಕಾಗಿ ಮತ್ತು ದೈಹಿಕ ಗಾಯಗಳನ್ನು ತಡೆಗಟ್ಟಲು ಭತ್ತ ಅಥವಾ ರಾಗಿ ಹುಲ್ಲನ್ನು ಹಾಸಿಗೆಯಾಗಿ ಬಳಸಬೇಕು.
2. ಹೆರಿಗೆಯ ಕೊಟ್ಟಿಗೆಯಲ್ಲಿ ಉತ್ತಮ ಗಾಳಿ, ಗಾಳಿಯ ಹರಿವು ಮತ್ತು ಸಾಕಷ್ಟು ಬೆಳಕು ಇರಬೇಕು. ನೆಲವು ಹಂದಿಗಳು ಜಾರದಂತೆ ಒರಟು ಹಾಗೂ ಮನೆಯ ತ್ಯಾಜ್ಯ ಹರಿದು ಹೊಗುವಂತೆ ಇಳಿಜಾರಾಗಿರಬೇಕು. ಮಲಗಲು ಸಾಕಷ್ಟು ಜಾಗವಿರಬೇಕು. ಆಹಾರ ಮತ್ತು ನೀರು ಯಾವಾಗಲೂ ಲಭ್ಯವಿರಬೇಕು.
3. ಮರಿ ಹಾಕುವ ಗುಡಿಸಲಿನ ಗೋಡೆಯಿಂದ ಮತ್ತು ನೆಲದಿಂದ 10” ದೂರದಲ್ಲಿ ನೆಲದಲ್ಲಿ ಫಾರೋಯಿಂಗ್ ಗಾರ್ಡ್ ಅನ್ನು ಚೆನ್ನಾಗಿ ಸ್ಥಾಪಿಸಬೇಕು. ಇದು ಗರ್ಭಿಣಿ ಹಂದಿಗಳನ್ನು ವಿಶ್ರಾಂತಿ ಪಡೆಯುವಾಗ ಬೆಂಬಲ ನೀಡುವ ಮೂಲಕ ಸುಲಭವಾಗಿ ಹೆರಿಗೆ ಮಾಡಲು ಸಹಾಯ ಮಾಡುತ್ತದೆ.
4. ಇದು ಮೂಲತಃ ಹಂದಿಮರಿಗಳ ಮೇಲೆ ಆಕಸ್ಮಿಕವಾಗಿ ತಾಯಿ ಹಂದಿ ಮಲಗುವುದನ್ನು ತಡೆಯಲು ಸಹಾಯ ಮಾಡುತ್ತದೆ. 25% ಕ್ಕಿಂತ ಹೆಚ್ಚು ಹಂದಿಮರಿಗಳ ಮರಣವು ತಾಯಿ ಹಂದಿ ಆಕಸ್ಮಿಕವಾಗಿ ಮರಿಗಳ ಮೇಲೆ ಮಲಗುವುದರಿಂದ ಸಂಭವಿಸುತ್ತದೆ ಎಂದು ಅಂದಾಜಿಸಲಾಗಿದೆ.
5. ಕಾಗೆಗಳು ಮತ್ತು ಇತರ ಪಕ್ಷಿಗಳಂತಹ ಪರಭಕ್ಷಕಗಳು ಕೊಟ್ಟಿಗೆಗೆ ಪ್ರವೇಶಿಸಿ ಹಂದಿಮರಿಗಳಿಗೆ ಗಾಯವನ್ನುಂಟು ಮಾಡುವುದನ್ನು ತಪ್ಪಿಸುವುದು ಅವಶ್ಯಕ. ಆದ್ದರಿಂದ ಮರಿ ಹಾಕುವ ಸಮಯದಲ್ಲಿ ಕಾಗೆಗಳು, ನಾಯಿಗಳು, ಬೆಕ್ಕುಗಳು, ಇಲಿಗಳು ಇತ್ಯಾದಿಗಳ ಪ್ರವೇಶವನ್ನು ತಡೆಯಲು ತೆರೆದ ಪ್ರದೇಶದ ಮೇಲೆ ಜಾಲದ ಹೊದಿಕೆಯನ್ನು ಒದಗಿಸುವುದು ಅವಶ್ಯಕ.
6. ನವಜಾತ ಹಂದಿಮರಿಗಳನ್ನು ತಾಯಿ ಹಂದಿಗಳು ನೆಕ್ಕುವ ಮೂಲಕ ನೋಡಿಕೊಳ್ಳುತ್ತವೆ. ಹಂದಿಮರಿಗಳ ದೇಹಕ್ಕೆ ಅಂಟಿಕೊಂಡಿರುವ ಹಂದಿಮರಿಗಳ ಲೋಳೆಯ ಪೊರೆಗಳು ಸ್ವತಃ ಒಣಗುತ್ತವೆ.
7. ಚಳಿಗಾಲದಲ್ಲಿ ಹಂದಿಮರಿಗಳ ದೇಹ, ಬಾಯಿ ಮತ್ತು ಮೂಗಿನ ಹೊಳ್ಳೆಗಳನ್ನು ಶುದ್ಧವಾದ ಬಟ್ಟೆಯಿಂದ ಸ್ವಚ್ಛಗೊಳಿಸುವುದು ಉತ್ತಮ. ಇದರಿಂದ ಉಸಿರಾಟವು ಸುಲಭವಾಗುತ್ತದೆ.
8. ಹಂದಿಮರಿಗಳು ಬೇಗನೆ ಕೆಚ್ಚಲಿನಿಂದ ಹಾಲು ಕುಡಿಯಲು ಕಲಿಯುತ್ತವೆ. ಹಂದಿಯ ಮೊಲೆತೊಟ್ಟುಗಳಲ್ಲಿ ಹಾಲು ಇದೆಯೇ ಎಂದು ಖಚಿತಪಡಿಸಿಕೊಳ್ಳುವುದು ಅವಶ್ಯಕ. ಕೆಲವೊಮ್ಮೆ ವಿವಿಧ ಕಾರಣಗಳಿಂದಾಗಿ ಅಗಾಲಾಕ್ಶಿಯಾ (ಉದಾ. ಎಂಎಂಎ ಸಂಕೀರ್ಣ) ಎಂಬ ಸ್ಥಿತಿ ಉಂಟಾಗಬಹುದು. ಇದರಲ್ಲಿ ಹಂದಿಯ ಕೆಚ್ಚಲಿನ ಗ್ರಂಥಿಗಳಲ್ಲಿ ಹಾಲು ಇರುವುದಿಲ್ಲ. ಅಂತಹ ಸಂದರ್ಭಗಳಲ್ಲಿ, ಹಾಲುಣಿಸುವಿಕೆಯನ್ನು ಸುಧಾರಿಸಲು ಮತ್ತು ಹಂದಿಮರಿಗಳ ಮರಣವನ್ನು ತಡೆಯಲು ತಿಳಿದಿರುವ ಕೆಲವು ಔಷಧಿಗಳಿಂದ ಹಾಲುಣಿಸುವಿಕೆಯನ್ನು ಪ್ರೇರೇಪಿಸುವುದು ಅಗತ್ಯವಾಗಿರುತ್ತದೆ.
9. ಹಂದಿಗಳು ಅಗಾಲಾಕ್ಶಿಯಾದಿಂದ ಬಳಲುತ್ತಿದ್ದರೆ, ನವಜಾತ ಹಂದಿಮರಿಗಳನ್ನು ಬೇರೆ ತಾಯಿಯ ಹತ್ತಿರ ಸ್ಥಳಾಂತರಿಸಬೇಕು ಮತ್ತು ಎಚ್ಚರಿಕೆಯಿಂದ ಪೋಷಿಸಬೇಕು. ಹಂದಿಮರಿಗಳಿಗೆ ತಾಯಿಯ ಸಗಣಿ ಮತ್ತು ಇತರ ಸ್ರವಿಸುವಿಕೆಯನ್ನು ಹಚ್ಚಬೇಕು. ಇದರಿಂದ ಅದು ಹೊಸ ಹಂದಿಮರಿಗಳನ್ನು ತಿರಸ್ಕರಿಸುವುದಿಲ್ಲ. ಏಕೆಂದರೆ ಅದು ಹಂದಿಮರಿಗಳು ತನ್ನದಲ್ಲ ಎಂದು ಗುರುತಿಸಬಹುದು.
10. ಸಾಕು ಮರಿಗಳನ್ನು ಕಚ್ಚುವುದರಿಂದ ಅಥವಾ ಕೊಲ್ಲುವುದರಿಂದ ಹಂದಿಯನ್ನು ತಡೆಯಲು ಎಚ್ಚರಿಕೆ ಅಗತ್ಯ. ಸಾಮಾನ್ಯವಾಗಿ, ಹೆರಿಗೆಯ ಮೊದಲ ವಾರದಲ್ಲಿ ಹಂದಿಯು ಸಾಕು ತಾಯಿತನವನ್ನು ಸ್ವೀಕರಿಸುತ್ತದೆ.
11. ಹಂದಿಗಳ ಹಾಲಿನಲ್ಲಿ ಕೊಬ್ಬಿನಂಶ ಹೇರಳವಾಗಿರುತ್ತದೆ. ಆದ್ದರಿಂದ, ಹಸುವಿನ ಹಾಲನ್ನು ಬಳಸಿ ಹಂದಿಮರಿಗಳಿಗೆ ಆಹಾರ ನೀಡುವುದು ಕಷ್ಟ. ಆದರೆ ಎಮ್ಮೆ ಹಾಲನ್ನು ಸ್ವಲ್ಪ ಮಟ್ಟಿಗೆ ನೀಡಬಹುದು. ಅತಿಯಾಗಿ ಆಹಾರ ನೀಡುವುದು ಹಂದಿಮರಿಗಳ ಅತಿಸಾರ ಮತ್ತು ಸಾವಿಗೆ ಕಾರಣವಾಗುತ್ತದೆ. ಹಾಗಾಗಿ, ಆಗಾಗ್ಗೆ ಸಣ್ಣ ಪ್ರಮಾಣದಲ್ಲಿ ಆಹಾರ ನೀಡಬೇಕು.
12. ಹಾಲಿನ ಪುಡಿಗಳನ್ನು ಬಳಸಿ ಕೃತಕ ಹಾಲು ನೀಡುವುದು ಪರ್ಯಾಯ ಪರಿಹಾರವಾಗಿ ಪ್ರಯೋಜನಕಾರಿ ಎಂದು ಕಂಡುಬಂದಿದೆ.
13. ಹಂದಿಮರಿಗಳಿಗೆ ರಕ್ತಹೀನತೆ ಬರುವ ಸಾಧ್ಯತೆ ಹೆಚ್ಚು. ಹಂದಿಮರಿಗಳಲ್ಲಿ ಕಬ್ಬಿಣ ಮತ್ತು ತಾಮ್ರದಂಶ ಕಡಿಮೆ ಇರುವುದರಿಂದ ಇದು ಸಂಭವಿಸುತ್ತದೆ. ಹಂದಿಮರಿಗಳಲ್ಲಿ ರಕ್ತಹೀನತೆಯಿಂದ ಮರಣವನ್ನು ತಡೆಗಟ್ಟಲು, ಹುಟ್ಟಿದ 1 ಅಥವಾ 2 ನೇ ದಿನದಂದು ಪ್ರತಿ ಹಂದಿಮರಿಗೆ ಕಬ್ಬಿಣದ ಸಲ್ಫೇಟ್ ಅನ್ನು ಚುಚ್ಚುವುದು ಮತ್ತು 10 ದಿನಗಳ ನಂತರ ಮತ್ತೊಮ್ಮೆ ಚುಚ್ಚುವುದು ಅವಶ್ಯಕ.
14. ಹಂದಿಮರಿ ಹಾಲಿನೊಂದಿಗೆ ಸೇವಿಸಲು ಅನುಕೂಲವಾಗುವಂತೆ ಕಬ್ಬಿಣದ ಸಲ್ಫೇಟ್ ಪೇಸ್ಟ್ ಅನ್ನು ಬೆಲ್ಲದ ನೀರಿನ ಜೊತೆ ಹಂದಿಯ ಕೆಚ್ಚಲಿಗೆ ಲೇಪಿಸಬೇಕು. ಕಬ್ಬಿಣದ ಸಲ್ಫೇಟ್‌ನ ವಾಣಿಜ್ಯ ಸಿದ್ಧತೆಗಳನ್ನು ಮೌಖಿಕವಾಗಿ ನೀಡುವುದನ್ನು ಸಹ ಶಿಫಾರಸು ಮಾಡಲಾಗಿದೆ.

ಸ್ಥಳೀಯ ತಳಿಗಳ ಸುಧಾರಣೆ

ತಳಿ ಸುಧಾರಣೆಯು ಹೆಚ್ಚಿನ ಇಳುವರಿ ನೀಡುವ ಹಂದಿಗಳನ್ನು ಪಡೆಯಲು ಒಂದು ಪ್ರಮುಖ ಮಾರ್ಗವಾಗಿದೆ. ತಳಿ ಸುಧಾರಣೆಯ ಮುಖ್ಯ ಉದ್ದೇಶವೆಂದರೇ, ಸ್ಥಳೀಯ ತಳಿಯಲ್ಲಿ ಸಕಾರಾತ್ಮಕ ಗುಣಲಕ್ಷಣವನ್ನು ಪರಿಚಯಿಸುವುದು. ಉದಾಹರಣೆಗೆ, ಸ್ಥಳೀಯ ಹಂದಿಯನ್ನು ವಿದೇಶಿ ಹಂದಿಯೊಂದಿಗೆ ಸಂಕರಿಸುವ ಮೂಲಕ, ಸಂತತಿಯು ತನ್ನ ತಂದೆಯಿಂದ ದೇಹದ ಆಕಾರ ಮತ್ತು ಉತ್ತಮ ಬೆಳವಣಿಗೆಯ ದರವನ್ನು ಮತ್ತು ತನ್ನ ತಾಯಿಯಿಂದ ಪರಿಸರ ಒತ್ತಡಕ್ಕೆ ಸಹಿಷ್ಣುತೆಯನ್ನು ಪಡೆಯುವ ಸಾಧ್ಯತೆಯಿದೆ.

ಕೃತಕ ಗರ್ಭಧಾರಣೆ

ರೈತರು ಮುಖ್ಯವಾಗಿ ಆಹಾರದ ಉದ್ದೇಶಕ್ಕಾಗಿ ಹಂದಿಯನ್ನು ಸಾಕುತ್ತಾರೆ. ಸಂತಾನೋತ್ಪತ್ತಿಗಾಗಿ ಗಂಡು ಹಂದಿಯ ಲಭ್ಯತೆ ಇಲ್ಲದಿರುವುದು, ಸಂತಾನೋತ್ಪತ್ತಿಯ ಹೆಚ್ಚಿನ ವೆಚ್ಚ, ಗರ್ಭಧಾರಣೆಯ ರೋಗನಿರ್ಣಯಕ್ಕೆ ವಿಧಾನಗಳ ಲಭ್ಯತೆ ಇಲ್ಲದಿರುವುದು ಮತ್ತು ರೈತರಲ್ಲಿ ಅರಿವಿನ ಕೊರತೆಯಿಂದಾಗಿ ಸಂತಾನೋತ್ಪತ್ತಿ ಉದ್ದೇಶಕ್ಕಾಗಿ ಹಂದಿ ಸಾಕಣೆಗೆ ರೈತರಲ್ಲಿ ಆಸಕ್ತಿಯ ಕೊರತೆಯಿದೆ.

ಕೃತಕ ಗರ್ಭಧಾರಣೆಯ ಪದ್ಧತಿಗಳು

ಗಂಡು ಹಂದಿಯ ತರಬೇತಿ : ಉನ್ನತ ವಂಶಾವಳಿಯ ಗಂಡು ಹಂದಿಮರಿಗಳನ್ನು ಹಾಲುಣಿಸುವುದನ್ನು ಬಿಡಿಸುವ ಸಮಯದಲ್ಲಿ ಆಯ್ಕೆ ಮಾಡಲಾಗುತ್ತದೆ ಮತ್ತು ಹೆಣ್ಣು ಪ್ರಾಣಿಗಳಿಂದ ದೂರ ಗುಂಪುಗಳಾಗಿ ಇಡಲಾಗುತ್ತದೆ. ಅಂತಿಮವಾಗಿ ಆಯ್ಕೆ ಮಾಡಲಾದ ಗಂಡು ಹಂದಿಗಳನ್ನು ಹೆಣ್ಣು ಹಂದಿಮರಿಗಳಿಂದ ಕನಿಷ್ಠ 50 ರಿಂದ 100 ಅಡಿ ದೂರದಲ್ಲಿ ಪ್ರತ್ಯೇಕವಾಗಿ ಇಡಲಾಗುತ್ತದೆ. ಹಂದಿ ತರಬೇತಿಯನ್ನು ಬೆಳಿಗ್ಗೆ ಆಹಾರ ನೀಡುವ ಮೊದಲು ಕೊಡಲಾಗುತ್ತದೆ. ಎಳೆಯ ಹಂದಿಗಳನ್ನು ಡಮ್ಮಿಯ ಬಳಿಗೆ ಪರಿಚಯಿಸಲಾಗುತ್ತದೆ ಮತ್ತು ಡಮ್ಮಿಯನ್ನು ಮೂಸಿ, ಅದರ ಮೇಲೆ ಹತ್ತಲು ಬಿಡಲಾಗುತ್ತದೆ. ಸಾಮಾನ್ಯವಾಗಿ, ಹಂದಿ 15 ದಿನಗಳಲ್ಲಿ ಡಮ್ಮಿಯ ಮೇಲೆ ಹತ್ತಲು ಪ್ರಾರಂಭಿಸಬೇಕು ಮತ್ತು 20 ರಿಂದ 25 ದಿನಗಳಲ್ಲಿ ವೀರ್ಯವನ್ನು ದಾನ ಮಾಡಲು ಪ್ರಾರಂಭಿಸಬೇಕು. ಈ ಪದ್ಧತಿಯು ಇವುಗಳನ್ನು ಒಳಗೊಂಡಿದೆ.

• ವೀರ್ಯ ಸಂಗ್ರಹಣೆ
• ವೀರ್ಯ ಮೌಲ್ಯಮಾಪನ
• ವೀರ್ಯ ಸಂಸ್ಕರಣೆ ಮತ್ತು ಸಂರಕ್ಷಣೆ

ಬೆದೆ ಪತ್ತೆ ಮತ್ತು ಗರ್ಭಧಾರಣೆ

• ಹಂದಿ ಅಥವಾ ಗಿಲ್ಟ್ ʼನಿಂತಿರುವ ಬೆದೆʼಯನ್ನು ಯಾವಾಗ ತಲುಪುತ್ತದೆ ಎಂಬುದನ್ನು ನಿರ್ಧರಿಸುವುದು ಬೆದೆ ಪತ್ತೆಯ ಗುರಿಯಾಗಿದೆ. ಗಿಲ್ಟ್‌ಗಳಲ್ಲಿ, ಬೆದೆಯು 40-48 ಗಂಟೆಗಳವರೆಗೆ ಇರುತ್ತದೆ. ನಿಂತಿರುವ ಈಸ್ಟ್ರಸ್ ಸಮಯದಲ್ಲಿ 12 ಗಂಟೆಗಳ ಮಧ್ಯಂತರದಲ್ಲಿ ಎರಡು ಸಲ ಗರ್ಭಧಾರಣೆಯನ್ನು ಮಾಡಿಸುವುದು ಆದ್ಯತೆಯ ತಂತ್ರವಾಗಿದೆ. ಆದರೇ, ಹಂದಿಗಳಲ್ಲಿ ಈಸ್ಟ್ರಸ್ (ಬೆದೆ) 72 ಗಂಟೆಗಳಿಗಿಂತ ಹೆಚ್ಚು ಕಾಲ ಮುಂದುವರಿದರೇ ಮೂರನೇ ಸಲ ಗರ್ಭಧಾರಣೆಯನ್ನು ಸಹ ಮಾಡಲಾಗುತ್ತದೆ.
• ಗಿಲ್ಟ (ಮರಿಹಾಕದ ಹೆಣ್ಣು ಹಂದಿ)ನಲ್ಲಿ ಬೆದೆ ಪತ್ತೆಯಾದ 12-24 ಗಂಟೆಗಳ ನಂತರ ಮತ್ತು ಮೊದಲ ಗರ್ಭಧಾರಣೆಯ 12 ಗಂಟೆಗಳ ನಂತರ ಮತ್ತೊಮ್ಮೆ ಹಂದಿಗಳನ್ನು ಗರ್ಭಧಾರಣೆ ಮಾಡಿಸಬೇಕು. ಹೆಣ್ಣು ಹಂದಿಗಳಲ್ಲಿ ಬೆದೆ ಪತ್ತೆಯಾದ 24-36 ಗಂಟೆಗಳ ನಂತರ ಮತ್ತು ಮೊದಲ ಗರ್ಭಧಾರಣೆಯ ನಂತರ ಮತ್ತೊಮ್ಮೆ 12 ಗಂಟೆಗಳ ನಂತರ ಹಂದಿಗಳನ್ನು ಗರ್ಭಧಾರಣೆ ಮಾಡಬೇಕು.
• ಕೃತಕ ಗರ್ಭಧಾರಣೆ (AI) ಕಾರ್ಯವಿಧಾನವನ್ನು ಅಚ್ಚುಕಟ್ಟಾಗಿ ಮತ್ತು ಸ್ವಚ್ಛವಾದ ವಾತಾವರಣದಲ್ಲಿ ನಡೆಸಬೇಕು. AI ಗಾಗಿ, ಕ್ಯಾತಿಟರ್‌ ಗರ್ಭಕಂಠದೊಳಗೆ ಹಾದುಹೋಗಲು ಅದರ ತುದಿಯನ್ನು ವೀರ್ಯನಾಶಕವಲ್ಲದ ಜೆಲ್‌ನಿಂದ ನಯಗೊಳಿಸಿ ಯೋನಿಯೊಳಗೆ ಸೇರಿಸಲಾಗುತ್ತದೆ ಮತ್ತು ಅಪ್ರದಕ್ಷಿಣಾಕಾರವಾಗಿ ತಿರುಗಿಸಲಾಗುತ್ತದೆ.
• ಗರ್ಭಕಂಠದಲ್ಲಿ ಕ್ಯಾತಿಟರ್ ಅನ್ನು ಲಾಕ್ ಮಾಡಿದ ನಂತರ, ವೀರ್ಯಚೀಲವನ್ನು ಕ್ಯಾತಿಟರ್‌ಗೆ ಜೋಡಿಸಲಾಗುತ್ತದೆ ಮತ್ತು ವೀರ್ಯವನ್ನು 3 ರಿಂದ 4 ನಿಮಿಷಗಳ ಅವಧಿಯಲ್ಲಿ ಗುರುತ್ವಾಕರ್ಷಣೆ ಮತ್ತು ಸೌಮ್ಯ ಒತ್ತಡವನ್ನು ಬಳಸಿಕೊಂಡು ಗರ್ಭಕಂಠದೊಳಗೆ ಹರಿಯಲು ಅನುಮತಿಸಲಾಗುತ್ತದೆ. ಕ್ಯಾತಿಟರ್ ಅನ್ನು ಬೆನ್ನೆಲುಬಿಗೆ 30º ಕೋನದಲ್ಲಿ ಸೇರಿಸಲಾಗುತ್ತದೆ.
• ಪಾರ್ಶ್ವ ಭಾಗವನ್ನು ಉಜ್ಜುವುದರಿಂದ ಹೆಣ್ಣು ಗರ್ಭಾಶಯದೊಳಗೆ ವೀರ್ಯವನ್ನು ಹೀರುವಂತೆ ಉತ್ತೇಜಿಸುತ್ತದೆ. ವೀರ್ಯವು ಸಂಪೂರ್ಣವಾಗಿ ಶೇಖರಣೆಯಾದ ನಂತರ, ಕ್ಯಾತಿಟರ್ ಅನ್ನು ಪ್ರದಕ್ಷಿಣಾಕಾರವಾಗಿ ತಿರುಗಿಸುವ ಮೂಲಕ ನಿಧಾನವಾಗಿ ಹಿಂತೆಗೆದುಕೊಳ್ಳಲಾಗುತ್ತದೆ.

ಕೃತಕ ಗರ್ಭಧಾರಣೆಯ ಪ್ರಯೋಜನಗಳು

• ಕಡಿಮೆ ಇನ್‌ಪುಟ್ ವೆಚ್ಚದೊಂದಿಗೆ ಸ್ಥಳೀಯ ಜರ್ಮ್‌ಪ್ಲಾಸಂ ಅನ್ನು ಸುಧಾರಿಸಲು ಇದು ಸುಲಭವಾದ ಮಾರ್ಗವಾಗಿದೆ.
• ಕೃತಕ ಗರ್ಭಧಾರಣೆಯು ಹೆಣ್ಣು ಹಂದಿಗಳ ಹಿಂಡುಗಳಲ್ಲಿ ಉತ್ತಮ ಜೀನ್‌ಗಳನ್ನು ಪರಿಚಯಿಸಲು ಉತ್ತಮ ಮಾರ್ಗವಾಗಿದೆ. ನೈಸರ್ಗಿಕ ಸಂಯೋಗದಲ್ಲಿ ಸಾಕಷ್ಟು ರೋಗ ಹರಡುವಿಕೆಯ ಅಪಾಯವಿರುತ್ತದೆ.
• ಇದು ಬೆಳವಣಿಗೆಯ ದರ, ಹೆಚ್ಚಿನ ಆಹಾರ ಪರಿವರ್ತನೆಯ ದಕ್ಷತೆ, ಮಾಂಸದ ಲಕ್ಷಣ, ತಾಯಂದಿರ ಸಾಮರ್ಥ್ಯ ಮತ್ತು ಮರಿಗಳ ಸಂಖ್ಯೆಯಂತಹ ಆರ್ಥಿಕ ಲಕ್ಷಣಗಳನ್ನು ಸುಧಾರಿಸಲು ಸಹಾಯ ಮಾಡುತ್ತದೆ.
• ಈಸ್ಟ್ರಸ್ ಸಿಂಕ್ರೊನೈಸೇಶನ್‌ನೊಂದಿಗೆ ಕೃತಕ ಗರ್ಭಧಾರಣೆಯು ಯೋಜಿತ ಮತ್ತು ನಿಯಂತ್ರಿತ ಸಂತಾನೋತ್ಪತ್ತಿಯಲ್ಲಿ ಬಹಳ ಉಪಯುಕ್ತವಾಗಿದೆ.
• ಕೃತಕ ಗರ್ಭಧಾರಣೆಯು ಒಳಸಂತಾನೋತ್ಪತ್ತಿಯನ್ನು ತಪ್ಪಿಸಲು ಸಹಾಯ ಮಾಡುತ್ತದೆ.
• ಸಂತಾನೋತ್ಪತ್ತಿ ಉದ್ದೇಶಕ್ಕಾಗಿ ಪ್ರತಿ ಸಾಕಾಣಿಕಾ ಕೇಂದ್ರದಲ್ಲಿ ಗಂಡು ಹಂದಿಯನ್ನು ಇಟ್ಟುಕೊಳ್ಳುವ ಅಗತ್ಯವನ್ನು ಇದು ನಿವಾರಿಸುತ್ತದೆ. ಇದರಿಂದ ಉತ್ಪಾದನಾ ವೆಚ್ಚ ಕಡಿಮೆಯಾಗುತ್ತದೆ.
• ದಾಖಲೆಯ ಉತ್ತಮ ನಿರ್ವಹಣೆಗೆ AI ಸಹಾಯ ಮಾಡುತ್ತದೆ.
• ಒಂದೇ ಸ್ಖಲನದಿಂದ ವೀರ್ಯವನ್ನು 10 ರಿಂದ 20 ಹೆಣ್ಣುಹಂದಿಗಳ ಸಂತಾನೋತ್ಪತ್ತಿಗೆ ಬಳಸಬಹುದು. ದೀರ್ಘಾವಧಿಯ ವಿಸ್ತರಣಾಕಾರಗಳ ಲಭ್ಯತೆಯೊಂದಿಗೆ, ಹಂದಿಯಲ್ಲಿ AI ಅನ್ನು ವ್ಯಾಪಕ ಪ್ರಮಾಣದಲ್ಲಿ ಅಳವಡಿಸಿಕೊಳ್ಳಲಾಗಿದೆ.

ಗರ್ಭಧಾರಣೆಯ ಧೃಡಿಕರಣದ ವಿಧಾನ

• ಗಭಾ೯ದಾನ ಮಾಡಿದ 21 ದಿನಗಳ ನಂತರವೂ ಹಂದಿಯು ಬೆದೆಯ ಲಕ್ಷಣಗಳನ್ನು ತೋರಿಸದಿದ್ದರೇ ಗರ್ಭಧಾರಣೆಯಾಗಿದೆ ಎಂದಥ೯.
• ಗಭಾ೯ದಾನದ 23-35 ದಿನಗಳ ನಂತರ ಎಕೋ-ಸ್ಕ್ಯಾನ್ ಗರ್ಭಧಾರಣೆ ಪತ್ತೆ ಪರೀಕ್ಷೆಯಿಂದ ಗರ್ಭಧಾರಣೆ ಧೃಡೀಕರಿಸಬಹುದು.