ವಸತಿ:

• ಹಂದಿಗಳನ್ನು ಆಶ್ರಯವಿರುವ ಹೊಲದಲ್ಲಿ ಅಥವಾ ಹಂದಿ ಮನೆಯಲ್ಲಿ ಇಡಬಹುದು.
• ಮನೆಯು ನೇರ ಸೂರ್ಯನ ಬೆಳಕು ಮತ್ತು ಮಳೆಯಿಂದ ರಕ್ಷಣೆ ನೀಡಬೇಕು. ಹಂದಿಗಳು ಶಾಖ ಮತ್ತು ಶೀತಕ್ಕೆ ಸೂಕ್ಷ್ಮವಾಗಿರುತ್ತವೆ.
• ನೆಲ ಮತ್ತು ಗೋಡೆಯು ಹಂದಿಗಳ ಬೇರೂರಿಸುವ ಅಭ್ಯಾಸವನ್ನು ತಡೆದುಕೊಳ್ಳುವಷ್ಟು ಬಲವಾಗಿರಬೇಕು. ಕಾಂಕ್ರೀಟ್ ನೆಲಹಾಸು ಸ್ವಚ್ಛಗೊಳಿಸಲು ಸುಲಭವಲ್ಲದೇ ಜಾಸ್ತಿ ಬಾಳಿಕೆ ಕೂಡ ಬರುತ್ತವೆ. ಗೋಡೆಗಳು ಇಟ್ಟಿಗೆಗಳಿಂದ ನಿಮಿ೯ಸಿರಬೇಕು ಮತ್ತು ಬಾಗಿಲುಗಳು ಬಲವಾದ ಮರದ ಹಲಗೆಗಳು ಅಥವಾ ಕಬ್ಬಿಣದಿಂದ ಮಾಡಲ್ಪಟ್ಟಿರಬಹುದು.
• ಹೊರಗಿನಿಂದ ಆಹಾರವನ್ನು ಸುಲಭವಾಗಿ ಒದಗಿಸಲು ಮೇವಿನ ತೊಟ್ಟಿಗಳು ಮತ್ತು ನೀರಿನ ತೊಟ್ಟಿಗಳನ್ನು ಮುಂಭಾಗದಲ್ಲಿ ಇರಿಸಬಹುದು.
• ಹಂದಿಗಳು 20-25oಸೆ. ತಾಪಮಾನದ ವ್ಯಾಪ್ತಿಯಲ್ಲಿ ಚೆನ್ನಾಗಿ ಬೆಳೆಯುತ್ತವೆ. ಉಷ್ಣ ಸೌಕರ್ಯವನ್ನು ಕಾಪಾಡಿಕೊಳ್ಳಲು ನೆರಳು ಹಾಗೂ ಈಜಾಡಲು ನೀರಿನ ಟ್ಯಾಂಕ್ ಒದಗಿಸಿ. ತಾಪಮಾನ ತಂಪಾಗಿಡಲು ನೀರು ಚಿಮುಕಿಸುವುದು ಮತ್ತು ತೊಳೆಯುವುದು ಮುಖ್ಯ.
• ಮನೆಯ ವಿನ್ಯಾಸವು ಎಲ್ಲಾ ಪ್ರಾಣಿಗಳನ್ನು ಹೊರಗಿನಿಂದ ಸುಲಭವಾಗಿ ವೀಕ್ಷಿಸುವ ಹಾಗೇ ಮತ್ತು ಕಾರ್ಮಿಕರ ಅವಶ್ಯಕತೆ ಕಡಿಮೆ ಇರುವ ಹಾಗೇ ಇರಬೇಕು.
• ಗಂಡು ಹಂದಿಗಳು, ಗರ್ಭಿಣಿ ಮತ್ತು ಗರ್ಭಿಣಿ ಇಲ್ಲದ ಹಂದಿಗಳು, ಗಿಲ್ಟ್‌ಗಳು ಮತ್ತು ಬೆಳೆಯುತ್ತಿರುವ ಹಂದಿಗಳನ್ನು ಸಾಮಾನ್ಯವಾಗಿ ಆಶ್ರಯ ಪ್ರದೇಶದೊಂದಿಗೆ ತೆರೆದ ಅಂಗಳದಲ್ಲಿ ಇರಿಸಲಾಗುತ್ತದೆ. ಹೆರಿಗೆಯಲ್ಲಿರುವ ಹಂದಿಗಳನ್ನು ಸಂಪೂರ್ಣವಾಗಿ ಮುಚ್ಚಿದ ಮನೆಗಳಲ್ಲಿ ಇರಿಸಲಾಗುತ್ತದೆ.
• ಮೇಲಿನ ಮಾರ್ಗಸೂಚಿಗಳ ಪ್ರಕಾರ ಸ್ಥಳೀಯವಾಗಿ ಲಭ್ಯವಿರುವ ವಸ್ತುಗಳಿಂದ ನಿರ್ಮಿಸಲಾದ ಸರಳ, ಕಡಿಮೆ ವೆಚ್ಚದ ಮನೆಗಳಿಗೆ ಗ್ರಾಮೀಣ ಪ್ರದೇಶಗಳಲ್ಲಿ ಆದ್ಯತೆ ನೀಡಲಾಗುತ್ತದೆ. ಎಲ್ಲಾ ವರ್ಗದ ಹಂದಿಗಳಿಗೆ ಬಳಸಬಹುದಾದ ಬಹುಪಯೋಗಿ ಮನೆಗಳನ್ನು ಆಯಾ ವಗ೯ದ ಸ್ಥಳದ ಅಗತ್ಯದ ಪ್ರಕಾರ ವಿನ್ಯಾಸಗೊಳಿಸಬಹುದು.
• ಉದ್ದವಾದ G.I. ಪೈಪ್‌ಗಳು/M S ರಾಡ್‌ಗಳಿಂದ ಮಾಡಲ್ಪಟ್ಟ ಪಂಜರಗಳಲ್ಲಿ ವೈಯಕ್ತಿಕ ಅಥವಾ ಗುಂಪಿನಲ್ಲಿ ಹಂದಿಗಳನ್ನು ಸಾಕಬಹುದು ಮತ್ತು ಹೈಟೆಕ್ ಫಾರ್ಮ್‌ಗಳಲ್ಲಿ ಮರಿಗಳನ್ನು ಸಾಕುವ ಕ್ರೇಟ್‌ಗಳನ್ನು ಕೂಡ ಅಳವಡಿಸಿಕೊಳ್ಳಬಹುದು.
• ಸಂತಾನಹರಣ ಶಸ್ತ್ರಚಿಕಿತ್ಸೆಗೊಳಗಾಗದ ಗಂಡು ಹಂದಿಗಳು ಹಾಗೂ ಹೆಣ್ಣು ಹಂದಿಗಳನ್ನು ನಾಲ್ಕು ತಿಂಗಳ ವಯಸ್ಸನ್ನು ಮೀರಿ ಒಟ್ಟಿಗೆ ಇಡಬಾರದು.
• ಇತರ ಸಾಕು ಪ್ರಾಣಿಗಳಂತೆ ಹಂದಿಗಳಿಗೆ ಶೆಡ್ ಅಥವಾ ವಾಸಸ್ಥಳದ ಅಗತ್ಯವಿದೆ. ಸ್ಥಳೀಯವಾಗಿ ಲಭ್ಯವಿರುವ ವಸ್ತುಗಳನ್ನು ಬಳಸಿಕೊಂಡು ಕಡಿಮೆ ವೆಚ್ಚದಲ್ಲಿ ಶೆಡ್ ಅನ್ನು ನಿರ್ಮಿಸಬಹುದು. ಮಾನವ ವಾಸಕ್ಕೆ ಯೋಗ್ಯವಲ್ಲದ ಮನೆಗಳನ್ನು ಮಾರ್ಪಾಡು ಮಾಡುವ ಮೂಲಕ ಹಂದಿಗಳನ್ನು ಸಾಕಬಹುದು. ಮನೆಗಳಲ್ಲಿ ಉತ್ತಮ ಬೆಳಕು ಮತ್ತು ಗಾಳಿಯ ಪ್ರಸರಣವನ್ನು ಒದಗಿಸಬೇಕು.

ಕಡಿಮೆ ವೆಚ್ಚದ ಹಂದಿ ಶೆಡ್‌ಗಳ ನಿರ್ಮಾಣ

1. ಉದ್ಯಾನ ಅಥವಾ ಕೃಷಿಭೂಮಿಯಲ್ಲಿ ಎತ್ತರದ ಸ್ಥಳದಲ್ಲಿ ಹಂದಿ ಶೆಡ್‌ಗಳನ್ನು ನಿರ್ಮಿಸಬಹುದು. ನೆಲಹಾಸು ಮತ್ತು ಪಕ್ಕದ ಗೋಡೆಗಳನ್ನು ಕಲ್ಲಿನ ಚಪ್ಪಡಿಗಳನ್ನು ಬಳಸಿ ನಿರ್ಮಿಸಬೇಕು ಮತ್ತು ಮರದ ಕಟ್ಟಿಗೆಯನ್ನು ಛಾವಣಿಯ ನಿರ್ಮಾಣಕ್ಕೆ ಬಳಸಬಹುದು, ಇದು ಆರ್ಥಿಕವಾಗಿರುತ್ತದೆ.
2. ವಿಶೇಷವಾಗಿ ಗರ್ಭಿಣಿ ಹಂದಿಗಳು ಆಕಸ್ಮಿಕವಾಗಿ ಬೀಳುವುದನ್ನು ತಡೆಯಲು ನೆಲವು ಒರಟಾಗಿರಬೇಕು ಮತ್ತು ಜಾರುವಂತಿರಬಾರದು.
3. ತೊಳೆದ ನೀರು, ಸಗಣಿ ಮತ್ತು ಮೂತ್ರದ ಸುಲಭ ಹರಿವಿಗೆ ಸಾಕಷ್ಟು ಇಳಿಜಾರು ಒದಗಿಸಬೇಕು. ಇದು ಗೊಬ್ಬರವನ್ನು ಉತ್ಪಾದಿಸಲು ಸಹಾಯ ಮಾಡುತ್ತದೆ.
4. ಉತ್ತಮ ಬೆಳವಣಿಗೆಗೆ ಎಲ್ಲಾ ಸಮಯದಲ್ಲೂ ಶುದ್ಧ ನೀರು ಲಭ್ಯವಿರಬೇಕು. ನೀರಿನ ತೊಟ್ಟಿ ಆಹಾರ ತೊಟ್ಟಿಯ ಪಕ್ಕದಲ್ಲಿರಬೇಕು. ಇದಲ್ಲದೆ, ಕಲ್ಲಿನ ಚಪ್ಪಡಿ ಮತ್ತು ಸಿಮೆಂಟ್ ಬಳಸಿ 1x1x1 ಮೀ (LBH) ಆಯಾಮದೊಂದಿಗೆ ಈಜಾಡಲು ಸಣ್ಣ ನೀರಿನ ತೊಟ್ಟಿಯನ್ನು ನಿರ್ಮಿಸಬಹುದು. ಬೇಸಿಗೆಯಲ್ಲಿ ಹಂದಿಗಳು ತಮ್ಮ ದೇಹವನ್ನು ತಂಪಾಗಿಡಲು ನೀರಿನ ತೊಟ್ಟಿ ಸ್ನಾನದ ತೊಟ್ಟಿಯಾಗಿ ಕಾರ್ಯನಿರ್ವಹಿಸುತ್ತದೆ.
5. ಬಳಸಿದ ನೀರನ್ನು ಕೃಷಿ ಭೂಮಿಗೆ ಬಿಡಬಹುದು, ಇದು ಗೊಬ್ಬರವಾಗಿ ಮೌಲ್ಯವನ್ನು ಹೆಚ್ಚಿಸುತ್ತದೆ.



6. ಗಂಡು ಹಂದಿಗಳು, ಗರ್ಭಿಣಿ ಹಂದಿಗಳು, ಹಾಲುಣಿಸುವ ಹಂದಿಗಳು ಮತ್ತು ಹಂದಿಮರಿಗಳಿಗೆ ಪ್ರತ್ಯೇಕ ಶೆಡ್ ವ್ಯವಸ್ಥೆ ಮಾಡಬೇಕು.
7. ಪ್ರತಿಯೊಂದು ಶೆಡ್‌ನಲ್ಲಿ ಮೇವಿನ ತೊಟ್ಟಿ ಮತ್ತು 24 ಗಂಟೆಗಳ ನೀರು ಸರಬರಾಜು ಮಾಡುವ ನೀರಿನ ತೊಟ್ಟಿಯನ್ನು ಒದಗಿಸಬೇಕು.
8. ಬೆಳಿಗ್ಗೆ ಮತ್ತು ಸಂಜೆ ಎರಡು ಬಾರಿ ಆಹಾರವನ್ನು ನೀಡಬೇಕು.
9. ಗರ್ಭಿಣಿ ಹಂದಿಗಳ ಶೆಡ್‌ನಲ್ಲಿ ಗೋಡೆಯಿಂದ ಮತ್ತು ನೆಲದಿಂದ 10” ದೂರದಲ್ಲಿ ಕಬ್ಬಿಣದ ಗಾರ್ಡ್ ಹಳಿಗಳು ಮತ್ತು ಉಕ್ಕಿನ ಪೈಪಗಳನ್ನು ಒದಗಿಸಬೇಕು. ಈ ಕಾವಲು ಹಳಿಗಳು ತಾಯಿ ಹಂದಿಯನ್ನು ಹಂದಿಮರಿಗಳ ಮೇಲೆ ಆಕಸ್ಮಿಕವಾಗಿ ಮಲಗುವುದನ್ನು ತಡೆಗಟ್ಟಿ ಮರಿಗಳ ಆಕಸ್ಮಿಕ ಮರಣವನ್ನು ತಡೆಗಟ್ಟುತ್ತವೆ.
10. ನೆಲದ ಸ್ಥಳದ ಅವಶ್ಯಕತೆ: 6-12 ತಿಂಗಳ ವಯಸ್ಸಿನ ಹಂದಿಗಳಿಗೆ ಪ್ರತಿ ಹಂದಿಗೆ 1.25 ಚದರ ಮೀ. ಸ್ಥಳಾವಕಾಶದ ಅಗತ್ಯವಿದೆ. ಇದಲ್ಲದೆ, ವಯಸ್ಕ ಬೆಳೆದ ಹಂದಿಗಳಿಗೆ ಪ್ರತಿ ಹಂದಿಗೆ 1.5 ಚದರ ಮೀ. ಸ್ಥಳಾವಕಾಶದ ಅಗತ್ಯವಿದೆ. ಇದಲ್ಲದೆ, ಪ್ರಾಣಿಗಳ ಸುಲಭ ಚಲನೆಗೆ ಅನುಕೂಲವಾಗುವಂತೆ ತನ್ನ ಸಹ ಹಂದಿಗಳಿಗೆ ಅವಕಾಶ ಕಲ್ಪಿಸಲು ಸಾಮಾಜಿಕ ಸ್ಥಳಾವಕಾಶದ ಅಗತ್ಯವಿದೆ.
11. ಬೇಸಿಗೆಯಲ್ಲಿ ಉತ್ತಮ ಬೆಳವಣಿಗೆ ಮತ್ತು ಕಾರ್ಯಕ್ಷಮತೆಗಾಗಿ ಹಂದಿ ಶೆಡ್ ಸುತ್ತಲೂ ದೊಡ್ಡ ಮರಗಳನ್ನು ಬೆಳೆಸುವುದು ತಂಪಾದ ವಾತಾವರಣವನ್ನು ಒದಗಿಸುತ್ತದೆ.

ಗಂಡು ಹಂದಿಗಳ ವಾಸಸ್ಥಳ

ಹಂದಿಗಳ ಮನೆ 6.25-7.5 ಚದರ ಮೀ. ವಿಸ್ತೀರ್ಣ ಮತ್ತು ವ್ಯಾಯಾಮಕ್ಕಾಗಿ 8.8-12 ಚದರ ಮೀ. ತೆರೆದ ಪ್ರದೇಶವನ್ನು ಒಳಗೊಂಡಿರಬೇಕು. ಗೋಡೆಗಳು ಕನಿಷ್ಠ 1.5 ಮೀ. ಎತ್ತರವನ್ನು ಹೊಂದಿರಬೇಕು.

ಹೆಣ್ಣು ಹಂದಿಗಳ ವಾಸಸ್ಥಳ

ಗಂಡು ಹಂದಿಗಳಂತೆ ಭಾಗಶಃ ಛಾವಣಿಯೊಂದಿಗೆ ತೆರೆದ ಅಂಗಳ ಮಾದರಿಯ ವಸತಿ ಒದಗಿಸಬಹುದು. ಒಟ್ಟು 10-15 ಹೆಣ್ಣು ಹಂದಿಗಳ ಗುಂಪು ಒಂದು ಮನೆಯಲ್ಲಿ ಇರಿಸಬಹುದು. ಪ್ರತಿ ಹಂದಿಗೆ 2 ಚದರ ಮೀ. ವಿಸ್ತೀರ್ಣವನ್ನು ಒದಗಿಸಬಹುದು.

ಫಾರೋಯಿಂಗ್ (ಹೆರಿಗೆಯಲ್ಲಿರುವ) ಹಂದಿಗಳ ವಸತಿ

ಹೆರಿಗೆಯಲ್ಲಿರುವ ಹಂದಿಗಳನ್ನು 2.5 x 4.0 = 10.0 ಚದರ ಮೀ. ವಿಸ್ತೀರ್ಣದ ಫಾರೋಯಿಂಗ್ ಮನೆಯಲ್ಲಿ ಪ್ರತ್ಯೇಕವಾಗಿ ಇರಿಸಬಹುದು, ಇದರಲ್ಲಿ ಕಾವಲು ಹಳಿಗಳು, ತೆವಳುವ ಪ್ರದೇಶ, ಮೇವು ಮತ್ತು ನೀರಿನ ತೊಟ್ಟಿಗಳ ಲಭ್ಯತೆ ಒದಗಿಸಬೇಕು.

ಹಂದಿಗಳಿಗೆ ಸ್ಥಳಾವಕಾಶದ ಅವಶ್ಯಕತೆಗಳು

ಬೆಳೆಯುವ ಮತ್ತು ಮಾರಾಟಕ್ಕಿರುವ ಹಂದಿಗಳ ವಸತಿ

ಮುಂಭಾಗದಲ್ಲಿ ವಿಶ್ರಾಂತಿಗಾಗಿ ಮುಚ್ಚಿದ ಕಾಂಕ್ರೀಟ್ ಅಂಗಳದ ಜೊತೆ ಮೇವು ಮತ್ತು ನೀರಿನ ತೊಟ್ಟಿಗಳು ಹಾಗೂ ಹಿಂಭಾಗದಲ್ಲಿ ತೆರೆದ ಅಂಗಳವನ್ನು ಒದಗಿಸಬೇಕು. ಪ್ರತಿ ಬೆಳೆಯುವ/ಕೊಬ್ಬಿಸುವ(ಮಾಂಸದ) ಹಂದಿಗೆ ಒಟ್ಟು ಸ್ಥಳಾವಕಾಶ 2 ಚದರ ಮೀ. ಆಗಿರಬೇಕು.

ಹಂದಿಮರಿಗಳಿಗೆ ವಸತಿ

• ಸಂತಾನೋತ್ಪತ್ತಿ ಮಾಡುವ ಹಂದಿಗಳು ಮತ್ತು ಅವುಗಳ ಮರಿಗಳನ್ನು ಮನೆಗಳಲ್ಲಿ ಅಥವಾ ತೆರೆದ ಮೈದಾನ ವ್ಯವಸ್ಥೆಯನ್ನು ಬಳಸಿಕೊಂಡು ಕೂಡ ಇರಿಸಬಹುದು.
• ಎಳೆಯ(ಸಣ್ಣ) ಮರಿಗಳನ್ನು ಬೆಚ್ಚಗಿಡಲು ಸಾಕಷ್ಟು ಹಾಸಿಗೆ ಸಾಮಗ್ರಿಗಳನ್ನು ನೀಡಬೇಕು ಮತ್ತು ಅದನ್ನು ಸಮಯಕ್ಕನುಸಾರವಾಗಿ ಬದಲಾಯಿಸಬೇಕು.
• ಮರಿಗಳನ್ನು ಬೆಳೆಸಿದ ಗೂಡುಗಳನ್ನು, ಮರಿಗಳನ್ನು ಹಾಲುಣಿಸಿ ಬೇರೆಡೆಗೆ ಸ್ಥಳಾಂತರಿಸಿದ ನಂತರ ಸಂಪೂರ್ಣವಾಗಿ ಸ್ವಚ್ಛಗೊಳಿಸಬೇಕು ಮತ್ತು ಸ್ಕ್ರಬ್ ಮಾಡಬೇಕು.
• ಹೊಲದಲ್ಲಿ ಮರಿಗಳನ್ನು ಬೆಳೆಸಿದರೆ, ಮುಂಬರುವ ಮರಿಗಳಿಗೆ ಪರಾವಲಂಬಿ ಹುಳುಗಳಿಂದ ಉಂಟಾಗುವ ರೋಗ ಸಮಸ್ಯೆಗಳನ್ನು ತಪ್ಪಿಸಲು ಆಶ್ರಯವನ್ನು ಹೊಸ ಸ್ಥಳಕ್ಕೆ ಸ್ಥಳಾಂತರಿಸಬೇಕು.

ನೈರ್ಮಲ್ಯ ಮತ್ತು ಸ್ವಚ್ಛತೆ

• ನೆಲವನ್ನು ಒಣಗಿಸಿ ಇಡಬೇಕು.
• ಆಹಾರದ ತೊಟ್ಟಿ(ಫೀಡರ್) ಅನ್ನು ಪ್ರತಿದಿನ ಶುದ್ಧ ನೀರಿನಿಂದ ಸ್ವಚ್ಛಗೊಳಿಸಬೇಕು. ಫೀಡರ್ ಅನ್ನು 5% KMnO4 (ಪೊಟ್ಯಾಸಿಯಮ್ ಪರ್ಮಾಂಗನೇಟ್) ಬಳಸಿ ಸ್ವಚ್ಛಗೊಳಿಸಬಹುದು.
• ನೆಲ ಮತ್ತು ಗೋಡೆಗಳನ್ನು ಪ್ರತಿದಿನ KMnO4 (ಪೊಟ್ಯಾಸಿಯಮ್ ಪರ್ಮಾಂಗನೇಟ್) (ಪ್ರತಿ ಲೀಟರ್ ನೀರಿಗೆ 2.5 ಗ್ರಾಂ.) ಬಳಸಿ ಸ್ವಚ್ಛಗೊಳಿಸಬೇಕು.
• ಹಂದಿ ಮನೆಯಲ್ಲಿ ಹೊರಗಿನ ವ್ಯಕ್ತಿಗಳ ಭೇಟಿಯನ್ನು ಕಟ್ಟುನಿಟ್ಟಾಗಿ ನಿಷೇಧಿಸಬೇಕು.
• ಹಂದಿ ಮನೆಯ ಸುತ್ತಲಿನ ಪ್ರದೇಶವನ್ನು (ರಸ್ತೆ/ಮಾರ್ಗ) KMnO4 ದ್ರಾವಣದಿಂದ ನಿಯಮಿತವಾಗಿ ಸ್ವಚ್ಛಗೊಳಿಸಬೇಕು.
• ಪ್ರಾಣಿಗಳೊಂದಿಗೆ ಕೆಲಸ ಮಾಡುವಾಗ ಬಟ್ಟೆಗಳನ್ನು ಪ್ರತ್ಯೇಕವಾಗಿ ಇರಿಸಿ ಮತ್ತು ಅವುಗಳನ್ನು ಇತರ ಪ್ರಾಣಿಗಳೊಂದಿಗೆ ಬೆರೆಸಬೇಡಿ.