1. ದಪ್ಪಸತ್ತೆ ಪದ್ದತಿಯಲ್ಲಿ ಸಾಕುವುದು

• ಈ ಪದ್ಧತಿಯಲ್ಲಿ ಕೋಳಿಗಳನ್ನು ಮನೆಯ ಒಳಗಡೆ ಸಾಕಲಾಗುತ್ತದೆ. ಈ ಪದ್ಧತಿಯಲ್ಲಿ ಕೋಳಿ ಸಾಕುವಾಗ ಗಾಳಿಯ ವ್ಯವಸ್ಥೆ ಚೆನ್ನಾಗಿರಬೇಕು. ಮನೆಯು 28 ಅಡಿ ಅಗಲವಿರಬೇಕು.
• ನೆಲದ ಮೇಲೆ ಸುಮಾರು 3-4 ಅಂಗುಲದಷ್ಟು ದಪ್ಪ ಲಿಟ್ಟರಿನ ವಸ್ತುವನ್ನು ಹಾಕಿರಲಾಗಿರುತ್ತದೆ (ಲಿಟ್ಟರಿನ ವಸ್ತು- ಭತ್ತದ ಹೊಟ್ಟು, ಮರದಪುಡಿ, ಪುಡಿಯಾಗಿ ಕತ್ತರಿಸಿದ ರಾಗಿ ಹುಲ್ಲು, ಕಬ್ಬಿನ ಸಿಪ್ಪೆ ಮುಂತಾದವು). ಲಿಟ್ಟರ್ ವು ಕೋಳಿಗಳಿಗೆ ಹಾಸುವ ಮೆತ್ತನೆಯ ವಸ್ತುವಾಗಿದ್ದು, ಕೋಳಿಮನೆಗಳ ನೆಲವನ್ನು ಒಣಸ್ಥಿತಿಯಲ್ಲಿ ಇಡುತ್ತದೆ ಮತ್ತು ಕೋಳಿಗಳ ಹಿಕ್ಕೆಯಲ್ಲಿನ ತೇವಾಂಶವನ್ನು ಹೀರಿಕೊಳ್ಳುತ್ತದೆ ಮತ್ತು ಶಾಖ ತಡೆಯಲು ಸಹಕಾರಿಯಾಗುತ್ತದೆ.
• ಕೋಳಿಗಳಿಗೆ ಕೆಲವು ಜೀವಸತ್ವಗಳನ್ನು ಒದಗಿಸುತ್ತದೆ. ಆದರೆ ಲಿಟ್ಟರ್ ನ ಮೇಲೆ ನೀರು ಬೀಳದಂತೆ ಜಾಗರೂಕತೆ ವಹಿಸಬೇಕು. ಒಂದು ವೇಳೆ ನೀರು ಚೆಲ್ಲಿದರೆ ನೆನೆದ ಭಾಗದ ಲಿಟ್ಟರ್‌ಅನ್ನು ಕೂಡಲೆ ತೆಗೆದು ಆ ಭಾಗದಲ್ಲಿ ಒಣಗಿದ ಲಿಟ್ಟರ್ ಹಾಕಿ ಸರಿಪಡಿಸಬೇಕು.

ದಪ್ಪಸತ್ತೆ (ಲಿಟ್ಟರ್) ಪದ್ಧತಿಯ ಅನುಕೂಲಗಳು

• ಬೇಸಿಗೆಯಲ್ಲಿ ತಂಪಾಗಿ, ಮಳೆ ಮತ್ತು ಚಳಿಗಾಲದಲ್ಲಿ ಬೆಚ್ಚಗೆ ಇರುತ್ತದೆ.
• ಎಲ್ಲ ಹವಾಮಾನಗಳಲ್ಲಿಯೂ ಕೋಳಿಗಳು ಅರಾಮಾಗಿರುತ್ತವೆ.
• ಅಮೋನಿಯ ಅನಿಲವು ಮನೆ ಒಳಗಡೆ ಹರಡುವುದಿಲ್ಲ.
• ಲಿಟ್ಟರವು ಕೋಳಿ ಹಿಕ್ಕೆಯ ತೇವಾಂಶವನ್ನು ಹೀರಿಕೊಳ್ಳುವುದರಿಂದ ಹಿಕ್ಕೆಯಿಂದ ಉತ್ಪಾದನೆಯಾಗುವ ಅಮೋನಿಯಾ ಅನಿಲ ಕಡಿಮೆಯಾಗಿ ನೊಣಗಳ ಬಾಧೆ ತಪ್ಪುತ್ತದೆ.
• ಈ ಪದ್ಧತಿಯಲ್ಲಿ ಮೊಟ್ಟೆ ಒಡೆಯುವ ಪ್ರಮಾಣ ಕಡಿಮೆ ಇರುತ್ತದೆ.
• ಕೋಳಿ ಮಾರಾಟವಾದ ನಂತರ ಲಿಟ್ಟರ್‌ ಅನ್ನು ಮಾರಾಟಕ್ಕಾಗಿ ಅಥವಾ ಗೊಬ್ಬರವಾಗಿ ಬಳಸಬಹುದು.
• ಕೋಳಿ ಹಿಕ್ಕೆಯು ದಪ್ಪಸತ್ತೆಯಲ್ಲಿ ಸೇರಿದಾಗ ಅದರಲ್ಲಿ ರಾಸಾಯನಿಕ ಹಾಗೂ ಬ್ಯಾಕ್ಟೀರಿಯಾಗಳ ಕ್ರಿಯೆಯಿಂದ ಬಿ-2 ಹಾಗೂ ಬಿ-12 ಜೀವಸತ್ವಗಳು ಉತ್ಪಾದನೆಯಾಗುತ್ತವೆ. ಇದನ್ನು ಕೋಳಿ ಹೆಕ್ಕಿ ತಿನ್ನುವುದರಿಂದ ಅವುಗಳ ಬೆಳವಣಿಗೆಗೆ ಸಹಕಾರಿಯಾಗುತ್ತದೆ.

ದಪ್ಪಸತ್ತೆ (ಲಿಟ್ಟರ್) ಪದ್ಧತಿಯ ಅನಾನುಕೂಲಗಳು

• ಕೋಳಿಗಳು ಆಹಾರ ತಿನ್ನುವಾಗ ಉಂಟಾಗುವ ನೂಕುನುಗ್ಗಲಿನಿಂದ ಸತ್ತೆಯಲ್ಲಿ ಮೇವು ಬಿದ್ದು ಹಾಳಾಗಬಹುದು.
• ಕೋಳಿಗಳು ಹೆಚ್ಚು ಓಡಾಡುವುದರಿಂದ ಆಹಾರದ ಅವಶ್ಯಕತೆ ಹೆಚ್ಚಾಗುತ್ತದೆ.
• ಕೋಳಿಗಳು ಪರಸ್ಪರ ಜಗಳವಾಡುತ್ತ ಗಾಯಮಾಡಿಕೊಳ್ಳುತ್ತವೆ.
• ಕೋಳಿಗಳು ಹೆಚ್ಚು ಪರೋಪಜೀವಿಗಳಿಗೆ ಗುರಿಯಾಗುತ್ತವೆ.
• ಸತ್ತೆ ಧೂಳಿನಿಂದ ಕೋಳಿಗಳ ಉಸಿರಾಟಕ್ಕೆ ತೂಂದರೆಯುಂಟಾಗಬಹುದು.
• ರೋಗ ಬಂದ ಕೋಳಿಗಳನ್ನು ಗುರುತಿಸಿ ಬೇರ್ಪಡಿಸುವುದು ಕಠಿಣವಾಗುವುದರಿಂದ ರೋಗ ಹರಡುವ ಸಾಧ್ಯತೆ ಹೆಚ್ಚು.

2. ಪಂಜರದಲ್ಲಿ ಸಾಕುವುದು

ಪಂಜರ ಪದ್ಧತಿ ಒಂದು ಆಧುನಿಕ ರೀತಿಯ ಕೋಳಿ ಸಾಕಾಣಿಕಾ ಪದ್ಧತಿ. ಈ ಪದ್ಧತಿಯಲ್ಲಿ ಕಡಿಮೆ ಸ್ಥಳದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕೋಳಿಗಳನ್ನು ಸಾಕಬಹುದು. ಆದರೆ ಈ ಪದ್ಧತಿ ಹಿತ್ತಲು ಕೋಳಿ ಸಾಕಣೆಯಲ್ಲಿ ಅನುಸರಿಸುವುದಿಲ್ಲ.

ರಾತ್ರಿ ಆಶ್ರಯದ ಮೂಲಭೂತ ಅವಶ್ಯಕತೆಗಳು

• ಹವಾಮಾನದಿಂದ ರಕ್ಷಣೆ
• ಪರಭಕ್ಷಕಗಳಿಂದ ರಕ್ಷಣೆ
• ಸುತ್ತಲು ಓಡಾಡುವುದಕ್ಕಾಗಿ ಸಾಕಷ್ಟು ಸ್ಥಳಾವಕಾಶ
• ಸಾಕಷ್ಟು ಗಾಳಿಯ ವ್ಯವಸ್ಥೆ
• ಸ್ವಚ್ಛ ಪರಿಸರ
• ರೋಗಗಳ ಅಪಾಯ ಕಡಿಮೆಯಾಗಿರಬೇಕು.